E proceso final ta canando pa saca departamento di Riool Water Zuivertingsysteem Installatie for di bou di Gobierno y pa e para practicamente riba su mesun pia.
Aña pasa Gobierno a informa cu lo pone 16 miyon pa drecha e planta di purificacion awa por completo. E instalacion na Bubali tabata causa basta problema di awa sushi, cu ta subi caminda yega te na e casnan pariba di caminda pero tambe tabata yega na e beachnan. UN mahos bista pa nos bishitantenan y situacion ahygienico pa e localnan cu mester a soporta esaki.
Gobierno a sinta cu su experto y conseheronan, pasobra e 16 miyon necesario pa drech’e ta nifica un suma grandi cu por dedica na otro proyectonan. Asina a bini cu e plan pa privatisa e RWZI. Pues ta saca esaki for di e ministerio cu awo ta cay bou di Minister Ursel Arends di Raiz.
Como cu tempo tabata coriendo, a dicidi pa mientras cu ta haya un inversionista of compania tum’e over, ta bay hink’e temporalmente bou di e compania madre di Asuntonan di Utilidad, esta Utilities Aruba NV.
E tardansa a causa cu e proceso aki awo mester ta cla pa fin di e luna aki. E cambio ta nifica cu e departamento cu ta bay ta riba su mes lo bay cay bou di Ministerionan di Minister Glenbert Croes. E RWZI lo bay bende su servicionan y cu e placa cu e ta genera ta paga su gastonan y alabes percura pa haci e inversionnan necesario den un instalacion mas moderno.
Aruba tin tres RWZI: Bubali, Parkietenbos y Zeewijk (e prome y ultimo ta atende cu awa di riool y esun di Parkienbos pa awa di poznan di wc). . Pero e prome ta e problema mas grandi pa motibo cu e ta situa den area turistico. E ta construi pa procesa 4500 meter cubico di awa pa dia, pero e ta procesa en realidad 8000 m3 di awa. Esaki a causa daño na e instalacion. A inverti algun miyon den dje pero esaki no ta suficiente. E mester di hopi mas placa pa crea un sistema moderno y bou di Utilities Aruba NV sigur lo mira e resultadonan desea.
Si tur cos sigui cana manera ta e caso awo, pa fin di e luna aki e cambio lo tuma luga oficialmente.