E celebracion di Dia di Tata ta dilanti porta, Diadomingo 16 di Juni venidero. Y aunke bo por
tende aki aya, tanto bal e tey of lagi tey, e ta e pilar fuerte den hopi famia sigur sin duda ! Ta
tuma un pareha den amor pa traha un yui y ta tuma e mesun pareha ey cu a bira mama y tata
pa lanta nan yiu , cu amor, diciplina, bon ehempel y perseverancia pa e yiu keda riba un bon
caminda. Ora nan tempo yega di habri hala y para riba nan mesun pia, responsabel pa nan
actonan y escogencianan, nos como mayornan tin cu sigui confia den Supremo Dios cu nan ta
bon y cu salud den nan felicidad cu nan mes a scoge y sigui crese atraves di nan mesun lesnan
y experiencianan den nan bida. Dia di Tata no ta hanya e mesun cantidad di atencion manera
Dia di Mama, pero ,esey no ta kita cu hopi di nos si ta stima y aprecia nos Tata. Lady Ruth ta
hopi, pero hopi bendiciona pa tin su kerido Tata na bida ainda den bon estado di salud, y ta
gradici Dios pa cada dia di nobo regala. Papa Lucas ta Tata di 3 yiu homber y un yiu muhe. E ta
un super bon Tata y awe cu su 91 anja ketobay ta sinta tras di su laptop, google cosnan
interesante y importante p’e y mas. Ketobay Papa ta conseha nos y nos ta sinya hopi di dje
ketobay. E ta super contento cu ela bira welo y bisawelo di varios nieto y bisanieto. Mi dos yiu
hombernan tambe a wordo bendiciona pa a bira Tata. Tur dos nos yiunan ta bon Tata. Mi tin
respet grandi pa nan. Nos ta stima nan ! Nos ta orguyoso di nan ! Y nos ta stima nos nieta y
nietanan y ta hopi bendiciona cu nan. Dushi pa wak nan den nan cresemento cu respet, amor,
diciplina y den nan talentonan. Scouting como un di e basenan a yuda sigur ! Deporte y musica.
Como yiu, Mama y Wela , Lady Ruth ta desea pa nan tende atrobe, of lesa atrobe con hopi mi
ta stima nan tur !! Pa Dia di Tata Juni 2024 mi ta brasa nan y bisa nan atrobe cuanto mi ta stima
nan, con orguyoso mi ta di nan. Mi Papa y mi esposo y mi dos yui hombernan ta Tatanan
ehemplar, nan ta stima nan yiunan. Nan ta comunica y scucha nan. Nan ta hunga wega cu nan.
Nan ta come hunto. Nan tey pa nan . Cu amor y gradicimento cu Dios a trese nan den mi bida,
mi ta sigui gradici y pidi bon Dios pa sigui drama su bendicion di gracia y abundancia na salud,
forza y sabiduria pa nan tur sigui padilanti den e bon caminda. Cu Dios bendiciona tur Tata di
Aruba pa stima nan yiunan y duna bon ehempel. Mi Tata, pa mi, ta e homber special cu mi a
canta di dj’e den mi cancion cu por wordo scucha na Radio Galactica.
For di awe, pabien na tur Tatanan ! Boso sigur tambe merece extra atencion y amor riba boso
Dia. Yiunan, respeta y stima boso Tata. Danki Papa pa ta mi heroe den mi bida ! Pasa un dushi
Dia di Tata colma di salud, alegria y mas sabiduria! Awe tambe, nos Tata di Cultura, Padu
Lampe dfm ta mas serca di nos mente, alma y curason. Y pa otronan cu nan Tata ya a bay
serca Tata Celestial , recordele awe na un manera mas special den un bunita oracion. Sigui
briya p’e den bo bon actitud y comportacion. Un dia, manera tur dia, y toch cu un toke special di
respet y admiracion pa tur e “hombernan special” cu a bira tata y cu ta traha duro pa pone pan
ariba mesa pa nan famia, y cu ta yuda den e educacion y formacion di nan yiunan na cas cu ta
sigui despues den mannan di e maestro y maestranan di scol. Ta bisa cu ta tuma un comunidad
pa lanta un mucha. Pero, e respet y bon maneranan ta cuminsa na cas. Danki pa lesa nos
relato cu atencion. Un “bearhug” grandi pa tur ! Felis Dia di Tata !
