Shonnan tur : BON ANJA !
Nos tambe ta bendiciona pa a drenta un otro anja, e anja nobo 2025 cu hopi emocion y
gradicimento na nos curason y pa por a despedi di 2024 cu a bay nos bon cu hopi experiencia
gana y cu hopi lesnan sinja y tambe cu hopi ups and downs. Nos a y ta keda positivo den nos
midi di fe y lo sigui duna bon Dios danki pa tur tur cos cada dia di nos bida den 2025 tambe. Dia
30 di December 2024 anochi, Johan Vrieswijk y su Lady Ruth a bay scucha Edjean Semeleer y
grupo di musico y cantantenan canta Dande den nos dushi bario di Dakota tur dia. Ki bunita
proyecto pa pueblo ! Ta Go Cultura so por bin cu proyectonan asina bunita, pa bishita barionan
den diferente districtonan cantando ariba un trailer grandi moviendo ariba wiel di un lugar pa
otro y asina hasi hopi hende felis pa tambe ricibi un Dande. Dushi pa tende Edjean canta dande
pa Ruthy y tambe pa su dos yui hombernan na Hulanda Rene y Jean. Dia 31 di December bispo
di anja anochi nos a pase serca nos mayornan den nos grupo intimo di famia cu esnan cu por a
bin. Ruthy, Payo y Valerie a prepara dushi snacksnan, pasa palo,bolo y champagna y nos a
companja nos dushi y bunita Mayo den kamber cu su tiara di Happy New Year bisti y su dushi
beis a permiti nos di saca pics como recuerdo. Despues nos a sinta cu Payo den veranda, disfruta
di e anochi cu tawata carga di recuerdonan y emocionnan di famia di e anja 2024 y tambe mas
atras den tempo. Lucas Jr.y Valerie a trese un fontein di vuurwerk cu nos a sende 12 or, ora cu
rond di Aruba por a scucha e tiki tiramento di klapchi y wak un shelo dorna un crenchi na tur
sorto di lus di color y figuranan bunita. No tawatatin hopi desordo y no a dura hopi tampoco. Ki
felis e bestianan di cas lo tawata ! Nos a brinda cu champagna, sigui combersa un crenchi mas y
despues laga tumba pa cas pa a laga Payonan bay drumi, pa no cansa nan di mas. Dia 1 di Januari
2025 Johan y Ruthy a bay bishista pa anja nobo su prome dia den oranan di anochi un di su
bunita y bon bisinyanan sra. Yolanda, cu ta masha atento cu nos mayornan. Ruthy contento di a
topa cu un ex studiante amigo di Avond Havo den anjanan setenta, Lorenzo Flores, cu a keda
mes guapo y hoben, ta manera tempo no a cambia. Nos a topa y saluda tambe amiga lieve Maria.
Dushi di a topa tambe cu un sra. lief, cu a duna nos compliment pa nos relatonan den
corant,bisando mi cu e ta lesa tur y pa mi sigui skirbi. Y ariba peticion di un otro bunita
sra.hoben bisti masha elegante mes na blanco, nos a recita un poema cortico, e unico cu Ruthy ta
corda foi cabes di “Aruba isla den laman.” Pruebanan cu locual nos a hasi den 2024 ta wordo
solicita pa nos sigui cu nan den 2025, esta, skirbi relato y poema y recita poema pa sigui inspira e
curasonnan rond di nos. Pueblo ta pidi, y Lady Ruth ta complace. Nos chispa di nos cambio y
entrada di anja den algun palabra expresa. Algun dia prome cu cambio di anja, nos a hanja un
shock ora nos a lesa riba facebook encuanto e fayecimento di ripiente inespera di nos bon amigo,
e mihor locutor cu e mihor bos na radio, Johnny Habibe di e radio emisoranan Mega 88 y Hit 94
FM. Un bon hende cu a biba na paz cu tur rond di dje. Un cabayero cu hopi fe y un bon curason.
Manera ta ley di naturaleza den universo, tristeza ta bay man den man cu alegria. Condolencia,
consuelo y amor na henter Aruba cu e gran perdida aki di un profeshonal cu a stima su hobbie cu
a bira su profeshon y a demonstra esaki tambe den e bon calidad di programanan y noticieronan
cu ela hiba, specialmente su “Johnnys Oldies”. Laga mi bay corta un slice di e dushi Kerstbrood
y Pan de Jamon cumpra na Superfood, super super dushi mes! E Mega Supermarket nr. 1 di
Aruba,” Superfood Plaza “cu tremendo bon prijs pa comestibles, bon servicio y cu ta yuda
instancianan tur rond di Aruba durante henter anja. Shonnan, ricibi y accepta bo anja nobo 2025
cu gradicimento na bo curason dia pa dia. Make the best out of it ! Stima y yuda bo mes pa por
stima y yuda un otro tambe ! Un “bearhug” grandi diki gordo pa tur nos dushi fiel lectornan di
nos relato semanal “Sabiduria den nos alegria ! Esaki, posibel cu cooperacion di Diario, Solo,
Extra Bonaire y EANews on line lesa y mira local y internacionalmente.
Danki pa lesa nos prome relato di 2025 cu amor y atencion. Nos lo sigui hasi nos best pa trese
noticianan social cultural y actividadnan cu nos lo bishita, mas serca di boso curason.
Aruba : Un Bon Anja ! Cu salud, alegria, gozo, pasenshi y sabiduria !
