Prome minister ta desea hopi exito na tur studiante cu ta bay studia den exterior

“Ohala cu pronto boso por termina boso estudio y bin bek Aruba y yuda nos sigui desaroya nos economia”

Un otro aña escolar ta tras di lomba y na e momentonan aki, studiantenan cu a caba scol aki na Aruba ta preparando pa bay sigui nan estudio den exterior. Momentonan cu hopi emocion tanto pa e studiante pero sigur tambe pa e famia. Ya caba e prome grupo di studiante a yega Hulanda y a wordo ricibi pa Minister Plenipotenciario mr. Ady Thijsen y director a.i. di Arubahuis drs. Glenda Hernandez. Tambe tawata presente representantenan di Departamento di Enseñansa di Arubahuis, studiementor y miembronan di e Plaatselijke Opvangcommissie (POC).

Prome Minister Evelyn Wever-Croes ta desea tur studiante cu a bay y ta bayendeo exterior pa sigui nan estudio, exito den e caminda cu nan a scoge pa un futuro briyante nan dilanti. “Mi ta desea tur studiante cu a bay y ta bayendo exterior den e proximo dianan pa sigui nan estudio, hopi exito. Mi ta encurasha cada un di boso pa boso nunca lubida cu unda cu boso bay, boso ta un embahador di Aruba. Semper laga atras un bon impression di Aruba. Tene cuenta cu no ta tur ora cos ta bay manera planifica. Pero semper keda enfoca riba boso meta y keda semper positivo, irespecto kico pasa. Percura pa boso logra locual boso a bay haci den exterior. Ohala cu pronto boso por termina boso estudio y bin bek Aruba y yuda nos sigui desaroya nos economia. Hopi exito den boso estudio y cu Dios bendiciona boso”. 

Na mayornan, Prome Minister a encurasha, pa nan ta fuerte den e fase aki cu nan yiu ta encamina den nan bida. “Esaki ta e momentonan talves mas duro cu sigur bida no ta prepara ningun mayor p’e. pero esaki ta e momento cu nos mester habri nos brasanan, habri hala y laga nos yiunan bay pa nan soño, biba riba nan mes den un pais straño. Sinembargo, nos mester confia cu e fundeshi di norma y balornan cu nos a duna nan, lo guia nan pa nan tuma e miho desicionnan ora nan ta riba nan mes den exterior. Hopi forsa y ban permiti nos hobennan pa nan ta riba nan mes y desaroya nan mes”.

Comunicado Prome Minister Evelyn Wever-Croes