Ku máksimo orguyo, gobièrnu di Boneiru, SKAL (Sekshon di Kultura, Arte i Literatura) ta anunsiá ku a nominá Segni Bernardina pa e elekshon nashonal di Coach di Kultura pa aña 2025. Segni ta un di e dies kandidatonan di e promé selekshon di kandidato pa e elekshon prestigioso akí ku LKZA (Landelijk Kenniscentrum Cultuureducatie en Amateurkunst) ta organisá.
E elekshon ta pone e coachnan di kultura den spòtlait, ku pa medio di nan trabou tin un impakto sosial i mental positivo riba nan komunidat.
Segni Bernardina ta un di e dies coachnan di kultura ku nan a selektá for di 115 nominashon pa e pre-selekshon nashonal.
Segni ta komprometé su mes diariamente pa proyektonan kaminda kultura, enseñansa i komunidat ta topa otro. Su trabou komo coach di kultura ta den signo di su lema personal: “Pa e arte di amor i e amor pa arte”.
“Pa e arte di amor i e amor pa arte ta ekspresá mi konvikshon ku arte ta un akto di dedikashon i un instrumento pa kambio. Hasiendo uso di arte i kultura, mi ke krea un ambiente kaminda hende por konektá ku nan mes, ku otro, i ku nan historia. Resultado di mi trabou mester kontribuí na kresementu di nos komunidat, fortifikashon di nos identidat i utilisashon di e forsa di sanashon ku kreatividat tin pa nos tur. Arte ta amor i amor ta kos pa kompartí. Kultura ta di nos tur – algu ku nos mester eksperensiá huntu i komparti ku otro,” segun Segni Bernardina.
Su vishon ta klarito: “Mi vishon ta basá riba e arte di amor i e amor pa arte. Mi ta kere ku kreatividat ta un forsa ku ta konektá hende ku otro i ku ta stimulá desaroyo kultural. Kada proyekto ku mi ta dirigí, ta impulsá pa e pashon ku mi ta sinti den mi kurason pa arte i kultura. Arte ta parti di ken nos ta – i nos ta kultura.”
Dia 20 di novèmber un hurado di eksperto ta anunsiá e ‘shortlist’ di tres finalista for di e tereno di trabou kultural. Dia 4 di desèmber, durante e Dia di Inspirashon pa Coachnan di Deporte den Bario i di Kultura na Apeldoorn, nan ta skohe e ganadó final komo Coach di Kultura pa aña 2025.
Ku e nominashon akí Segni Bernardina ta mustra kon fuerte arte por ta komo un instrumento pa trese hende mas serka di otro – na Boneiru mes i pafó di nos isla.
Por haña mas informashon tokante e elekshon riba wèpsait di LKCA:
https://www.lkca.nl/artikel/verkiezing-cultuur-coach-van-het-jaar-2025/
Press release: Gobièrnu di Boneiru
