Konseho Sosial-Ekonómiko (SER) a emití awe su konseho na Minister di Enseñansa, Siensia, Kultura i Deporte (OWCS), sr. Sithree ‘Cey’ van Heydoorn, tokante e konsepto di un dekreto gubernamental, ku ta kontené medidanan general, ku lo regla i duna forma na e Fondo di Deporte Kòrsou, ku ta un fondo públiko destiná pa finansiá deporte riba e isla.
E konsepto di e dekreto tin komo meta regla kon lo rekoudá, repartí i hustifiká sènnan públiko, designá pa promové deporte na Kòrsou. E fondo, ku tin su base legal den e Ordenansa Fondo di Deporte Kòrsou (P.B. 2021, no. 120), tin komo ophetivo prinsipal duna sosten struktural tantu na deporte di bario komo na deporte di nivel haltu, i na mes momento fortalesé maneho públiko riba tereno di salú, integrashon sosial i desaroyo di talento. Den e teksto di e konsepto dje dekreto, ku SER a risibí pa evaluá, tin e meta di e fondo deskribí, e kondishonnan bou di kua por haña finansiamentu for di sènnan públiko, i e proseduranan di evaluashon i responsabilisashon di propósito i proyektonan deportivo.
SER a wak e proposishon for di tres ángulo: for di ángulo hurídiko (si e reglanan proponé ta aliniá ku e Ordenansa Fondo di Deporte i si nan ta pas den e kuadro legal general), for di ángulo finansiero i di riésgo (orígen i stabilidat di e sènnan den e fondo, posibel saldo ku no ta husa òf finansiamentu dòbel) i for di e ángulo sosio-ekonómiko (aporte di deporte na salú, partisipashon i produktividat den un sosiedat ku ta enbehesiendo i ku su gastonan di kuido ta haltu).
SER no ta bisa si e forma kon ke duna kontenido real na e Fondo di Deporte, pa medio di e dekreto gubernamental, mester ser aprobá eksaktamente manera e ta redaktá aworaki. Na su lugá, e órgano di konseho i konsulta ta lansa algun pregunta skèrpi riba e fondo ku Gobièrnu lo mester tuma na konsiderashon durante e siguiente fase: si e instrumento proponé ta keda den kuadro di lei, si su finansiamentu ta sostenibel riba mediano plaso i kua ta e balor agregá ku e struktura skohé lo tin realmente pa komunidat di Kòrsou.
SER ta wak Fondo di Deporte Kòrsou mas di aserka
