Featured Bonaire

TCB ta wak bèk riba un eksitoso Bonaire Tourism Summit


Dia 26 di sèptèmber 2022 Tourism Corporation Bonaire (TCB) a organisá su di dos Bonaire Tourism Summit anual na Courtyard by Marriott.

Durante e kumbre TCB a konta tokante su vishon, su akshonnan i su strategia pa desaroyo turístiko ku un presentashon na enkargo di Miles Mercera, direktor di TCB. TCB a presentá un bista general di e situashon aktual, e resultadonan i e planifikashon di Boneiru pa aña 2023. Tambe TCB a duna un bista adelantá di e prestashonnan pa wenter 2022/2023. 

Miles Mercera: ‘E input ku nos a risibí di e sektor públiko-privá di turismo a inspirá mi. Den un intento pa sinkronisá nos strategia pa aña 2023, e tipo di seshonnan akí ta yuda nos bini den kontakto ku nos stakeholdernan di mas importante riba tereno di turismo. Desaroyo di turismo sostenibel ta un aporte di nos tur i TCB ta rekonosé e importansia di kompartí i risibí e fitbèk i input nesesario pa alkansá nos potensial turístiko’.

Diputado di Desaroyo Ekonómiko i Turismo, sr Hennyson Thielman, a yama tur presente bon biní i a pone énfasis riba importansia di dedikashon di henter e industria pa inklushon di nos komunidat. ‘Pa medio di tuma mas hende lokal den servisio pa sektor di turismo i alabes hisa e sueldo mínimo, ta alsa no solamente kalidat di bida di nos poblashon lokal, pero e ta kontribuí tambe na loke nos bishitantenan ta eksperensiá. Di nos banda nos ta bai invertí den formashon i treinen.’

Durante e kumbre e agensia ofisial di TCB, Dunn&Co di Tampa, Florida, a duna un bista general di e proseso di ‘rebranding’ di nos isla, di su reposishonamentu i desaroyo di identidat te e planifikashon di kampaña i medionan di komunikashon. Nan a revelá tambe e pensamentu tras di e wèpsait nobo di nos isla i e strategia di ‘digital-first social media’. ‘Tabata un tremendo eksperensia pa yuda Boneiru den strukturashon di un plataforma nobo di komunikashon, pasobra e isla akí ta realmente lo mihó ora ta trata di eko-turismo’, segun Troy Dunn, presidente i direktor komersial di Dunn&Co. ‘Nan outentisidat di marka ta reflehá su mes den tur loke nos ta hasi pa informá mundu tokante nan dedikashon na e ekilibrio importante entre naturalesa humano i Mama Naturalesa.’ 

Despues ku resientemente a anunsiá Boneiru su rekonosementu komo Kapital Kulinario di mundu, sr Erik Wolf, direktor i fundadó di World Food Travel Association, a papia tokante Boneiru su strategia kulinario pa futuro. Sra Stephanie de la Hera, kende ta representá Boneiru pa Diamond Public Relations (e ofisina di relashonnan públiko di Boneiru) a mustra un bista general di e esfuersonan ku durante e aña akí nan a hasi te ku awor i di e resultadonan i trèntnan pa aña 2023. Nan a pone énfasis tambe riba nos strategia di relashonnan públiko komo destinashon pa e lunanan binidero. 

E kumbre a yama bon biní tambe na sr Sander Langeveld, Liaison na Oropa pa Tourism Corporation Bonaire, kende a presentá un bista general di e prestashonnan di merkadeo na Oropa (Hulanda, Bélgika i Alemania) i a splika mas tokante e perspektiva riba término largu pa e merkado oropeo. Sr Maarten van der Scheer, direktor di Bonaire International Airport a revelá djis un tiki tokante futuro di Bonaire International Airport (Flamingo Airport)  i nan prioridatnan di mas importante.

Na final di e dia tabatin un Tourism after 5 Cocktail Hour ku ENNIA a organisá pa klousurá e Bonaire Tourism Summit. 

Komo parti di e Bonaire Tourism Summit TCB ta organisá tambe un seminario spesial ku seshonnan interaktivo di ‘breakout’, kaminda mundu empresarial por partisipá i duna input pa inisiativanan di merkadeo pa Boneiru pa aña 2023.

TCB ke gradisí tur partner manera BONHATA, BHG, BIA i OLB ku a sostené i partisipá na e kumbre.

Si bo a pèrdè e Bonaire Tourism Summit, bishitá e página di YouTube di TCB ‘Bonaire Island’ pa e livestream video.

Related posts

Nos mester sigui e protocolnan di higiena y nos mes mester cuida nos mes

EA News Author

Minister Lampe: Mi ta dispuesto pa tuma vacuna pa motibonan cientifico

EA News Author

Renobacion di facilidad di refineria pa uno di gas lo crea rond di 200 cupo di trabou

EA News Author

Leave a Comment