ORANJESTAD,Aruba
Cu tur bon intencion cu tabatin cu e compania aki pa hacie uno sui generis, no a logra te ainda. Si mira cu te ainda ni e terenonan no a pasa ainda riba nomber di Serlimar.
Henter e inicio di Serlimar tabata hopi stroef unda cu te na 2008 a apunta e prome hendenan pa forma parti di e Raad van Toezicht. Na momento cu a lanta e compania Sui Generis, tabata existi 51 funcion y tabatin 176 puesto.
Aunke ta wordo bisa cu a cambia e empresa pa uno Sui Generis pa evita metemento politico, por mira claramente cu na esaki a yega un fin na momento cu a yega e eleccionnan di 2009 y a uza SERLIMAR un biaha mas como instrumento politico.
Na inicio di e empresa caba a subi su gastonan di personal drasticamente for di 3.9 miyon florin pa 8.6 miyon florin, siendo cu e cantidad di personal a baha for di 164 persona pa 147 empleado. E siguiente aña e cantidad di personal den servicio a baha na 133 persona, pero e gasto a subi pa 9.1 miyon fllorin
E compania tabatin 122 persona na 2008 trahando y di repente na 2009 el a subi te na 190. Pues aumentando e gasto di persona pa 10.1 miyon florin. Un suma averahe di di 66 mil florin pa empleado pa aña.
Den e añanan cu a sigui e cantidad di empleadonan den servicio a subi y baha, pero no e suma di gasto di personal.
Segun e ultimo compilacion, na 2019 tabatin un total di 229 persona den servicio pa un poco mas cu 16 miyon florin na gasto di personal. Di 2005 pa 2009 a hinca e ploegnan cu ta haci caminda limpi, cu tabata bou di DOW, pa SERLIMAR. Esaki a contribui tambe na aumento di e gastonan. Banda di esaki, na 2013 a crea Mantencion di Bo Bario unda a hinca tur ploeg bou di SERLIMAR. E grupo aki na 2019 tabata costa SERLIMAR 5.6 miyon florin.
Na 2013, bou Gabinete Mike Eman, e compania a haya e ordo pa crea un seccion nobo den SERLIMAR cu yama Mantencion di Bario. Aunke e grupo aki su gastonan no ta cay bou gasto di personal pero ta un post apart. A tuma 7 supervisor den SERLIMAR, a cumpra 7 pickup nobo cash.
Na 2014 a amplia Mantencion di Bo Bario den area turistico y a realisa proyectonan pa Plan BoBario. Na 2013 pues a yega na un cantidad di no menos cu 74 ploeg cu un total di 230 persona den servicio di nan. A logra bahe aña pasa na 60 ploeg cu 123 persona den nan servicio (di e ploegnan).
