Cu bista riba e anuncio recientemente pa e lansamento oficial di e ‘Meldpunt pa Abuso contra Adulto Mayor’ door di Directie Ouderenzaken, mi kier para keto riba un problematica social cu structuralmente mester wordo confronta den curason di nos hogarnan.
E datonan comparti pa e departamento ta causa un dolor profundo. Desde januari di e aña aki, un cantidad preocupante di casonan di abuso y negligencia ta wordo atendi caba pa e departamento conhuntamente cu otro stakeholdernan. Mas doloroso ainda ta e realidad cu gran parti di e casonan aki ta mara na conflictonan familiar, loke ta traduci den negligencia, falta di un cuido adecuado y, den hopi ocasion, un isolacion social di nos grandinan.
Un problematica cu ta bati na nos consenshi
Abuso contra adulto mayor no semper ta fisico; e ta scondi den e falta di atencion, den e desamparo financiero y den e olvido di esnan cu un dia a duna tur cos pa nos. “Nos no por permiti pa e personanan cu a construi e pais aki, esnan cu a haci sacrificio pa nan famia, pasa nan ultimo añanan bibando den temor, descuido of sintiendo nan mes un carga,” Shailiny Tromp-Lee a expresa.
E problematica aki ta un yamada directo na nos nucleo familiar. Como yiu, como ruman, como nieto of nieta, nos tin un deber moral y sagrado cu no por wordo delega na un instancia so. E cuido y e proteccion di nos adultonan mayor ta cuminsa na cas. Hogar mester ta e luga di mas sigur pa nan, no e luga caminda nan derechonan ta keda viola of nan ta keda maltrata.
Kibra e silencio: raporta
Pa e motibo aki, Tromp-Lee ta haci un apelacion fuerte na henter e comunidad di Aruba pa asina no bira cara atras ora tin sospecho di un situacion inhusto, di negligencia of di maltrato. Un comunidad sano y civilisa ta wordo midi pa e forma con e ta trata e linknan di mas vulnerabel den su sociedad, specificamente nos muchanan y nos grandinan.
Kibra e silencio ta un acto di amor y di civilisacion. Si bo ta biba, observa, of tin un sospecho serio cu un adulto mayor ta wordo intimida, maltrata legalmente, financieramente of structuralmente descuida pa su circulo familiar, bo tin e herment pa actua.
E linea telefonico 281-5182 di Directie Ouderenzaken ta disponibel durante oranan di oficina pa asina ricibi tur melding y cuminsa e proceso di asistencia multidisciplinario conhuntamente cu instancianan specialisa manera KPA, Departamento di Asuntonan Social y Veiligheidshuis.
Compromiso Structural
“Mi ta sostene e esfuerso di e Directora di Directie Ouderenzaken, Desiree Helder, y su ekipo pa e formacion di e protocol y convenionan formal aki. Como parlamentario, mi compromiso ta keda firme pa sostene, vigila y duna e empuhe legislativo y presupuestario necesario na e tipo di iniciativanan aki. Nos adultonan mayor a cuida nos den pasado; awor, structuralmente, ta nos turno pa debolbe nan e dignidad y e siguridad cu nan merece,” Tromp-Lee a conclui.