Movimiento sindical ta insisti cu Parlamento mester keda e voz principal den discusion riba Rijkswet HOFA. Sindicatonan uni a enfatisa cu nan no ta contra supervision financiero, pero nan ta mantene un posicion firme cu autodeterminacion y libertad di Aruba no ta negociabel bou di ningun circunstancia.
Segun e movemento sindical, e señal cu nan kier manda ta dirigi tanto na gobierno di Aruba y Hulanda, como tambe na Parlamento di Aruba. Nan a reconoce cu fayonan financiero den pasado, particular bou di gobierno anterior, mester wordo corigi y cu supervision financiero por contribui na disciplina y stabilidad fiscal.
Sinembargo, sindicatonan a subraya cu, den tur discusion tocante e Rijkswet HOFA, e voz di pueblo representa door di Parlamento mester keda e punto central den e proceso di decision. Nan ta alerta cu ningun sistema of acuerdo no mester pone Parlamento na banda ni reduci su rol den determinacion di rumbo di pais.
Sindicatonan a enfatisa cu respet pa institucionnan democratico ta esencial pa mantene confianza den gobernacion y participacion ciudadano. Nan posicion ta cu Aruba mester keda cu su propio voz y su propio deseo den determinacion di direccion futuro di pais.
E declaracion, atribui na representacion di sindicatonan uni, ta forma parti di un debate mas amplio riba balansa entre responsabilidad financiero, supervision internacional y derecho di autodeterminacion nacional.