Fin di siman pasa a tuma luga un iniciativa di Heart Centered Leadership Foundation, caminda
ta empodera hoben via diferente proyecto moderno y creativo. Riba 12 y 19 di juli, un total di
dies participante a haya un Basic Podcast Workshop facilita pa Stichting Djis Pa Hari Media
Verse, kende ta un organisacion enfoca riba asisti den desaroyo di talento y stimulacion di
Aruba su economia oraño.
Esaki tabata un tayer di dos dia facilita pa Ephrayim Odor y Semi Chahmi, caminda
participantenan a siña e "basics" riba con pa setup un podcast. Despues nan a bay over na traha nan propio concepto y graba un test di nan podcast. Nan mes a setup tur cos, prepara
nan temanan, y nan a graba nan mes. Cu e conocemento nobo aki, e idea ta pa nan mes bay
crea un plataforma di hoben pa hoben bao guia di Heart Centered Leadership Foundation.
Esaki ta actividadnan cu no solamente ta introduci conceptonan nobo na nos hobennan, cu nan
por bay sigui desaroya nan mes mas den futuro como un carera profesional, pero tambe pa
stimula desaroyo personal den varios aspecto. Hobennan ta siña traha cu otro, colabora,
brainstorm hunto, bin cu solucionnan na problemanan cu presenta na ultimo momento, y asina
por sigui menciona e beneficio di e tipo di actividadnan aki. Esaki ta algo cu Heart Centered
Leadership Foundation semper a para duro tras di dje pa medio di diferente actividad y
programa cu nan ta brinda. Tambe, dunando e hoben e oportunidad pa crea su propio
plataforma y vocifera su opinionnan, comparti su ideanan, y crea un espacio caminda por educa
y motiva otro riba diferente tema.
Y awor tambe Stichting Djis Pa Hari Media Verse, kende ta bay yuda contribui den haci e vision
mas grandi ainda, cu e sosten di nos comunidad y tur cu ta kere den desaroya y crea cosnan
nobo pa Aruba. Tur esaki tabata posibel danki n’e sosten cu Heart Centered Leadership
Foundation ta ricibi for di Fonds 21.
