ORANJESTAD, Aruba
Na cuminsamento di e aña aki Santa Rosa/DLVV a ricibi un peticion for di e studiante Katiuska Arias cu ta atendiendo Universidad di Aruba, kende ta den curso di su ultimo aña di estudio na e Facultad di FEF. Katiuska a pidi coperacion pa realisa un studio riba Aruba su Sector Primario.
Durante e temporada di COVID-19 e studiante aki a haci un estudio pa Departamento di Agricultura, Cria y Pesca/Santa Rosa, cual mester a midi e impacto cu e implementacion di e propuesta di ley riba un dispensacion di impuesto, lo por tin riba Sector Primario di Aruba.
Factor tempo a haci cu Katiuska a enfoca su studio primordialmente riba e sector di Agricultura na local. Y apesar cu nos tabata den temporada di SiP y Cuarentena pa motibo di e pandemia di COVID-19, Katiuska a logra entrevista un total di 23 cunukero.
E meta principal di e estudio aki tabata pa midi e disponibilidad di e cunukeronan local pa expande nan produccion, sin e temor pa paga impuesto cu lo por cay pisa pa nan.
For di e investigacion por a saca afor cu un gran mayoria di nos cunukeronan tin intencion di expande nan producion y pa cuminsa bende mas di nan productonan cu nos comunidad. Esaki ta demostra cu nos agricultornan local ta pensando mas y mas pa expande nan trabounan, cual lo resulta beneficioso pa nos comunidad.
Minister Romero a keda sumamente satifescho y agradecido cu e studio di srta. Katiuska Arias, mas ainda mirando cu e ta cuadra completamente cu su vision pa Aruba su Sector Primario.
