Resientemente Taskforce di Reino pa Derechi di Mucha a tene un reunion eksitoso na Aruba, markando un logro importante den e kolaborashon kontinuo pa fortifiká protekshon i promoshon di derechi di mucha den henter Reino.
E reunion a keda presidí pa Sra. Sacha Geerman di Ministerio di Asuntunan Sosial di Aruba, kende aktualmente ta fungi komo presidente di Taskforce. E enkuentro aki tabata e promé reunion presensial despues di desaroyo i aprobashon di e Kuadro Stratégiko di Taskforce, Plannan di Akshon Nashonal i Kuadro di Monitoreo. E dokumentonan aki a bira realidat ku yudansa di UNICEF Hulanda. Pa promé biaha den historia di Taskforce nan tin un aserkamentu pa kolaborashon entre e islanan strukturá i ku indikadónan standarisá.
Komo konsehero stratégiko di Taskforce, UNICEF Hulanda tambe tabata presente durante e reunion, ora ku kada isla a kompartí e resultadonan di un tarea, resaltando diferente situashon vulnerabel ku muchanan ta enfrenta den nan konteksto lokal. Saba a presentá tokante vulnerabilidat di muchanan migrante den enseñansa, Boneiru tokante kriminalidat hubenil, Kòrsou tokante muchanan indokumentá, Sint Eustatius tokante muchanan ku autismo, Sint Maarten tokante hubentut i krimen, i Aruba tokante muchanan ku nesesidat spesial.
E reunion a inkluí tambe diskushonnan riba kuido resindensial entre islanan i paisnan den Reino, plan di mayor di Aruba i e programa “Alleen jij bepaalt” riba prevenshon i kambio di komportashon. Ademas, miembronan di Taskforce por eksperensiá TeamUp: un programa ku ta duna sosten sikososial na muchanan ku ta enfrentá sierto sirkunstansianan vulnerabel.
Den su palabra di apertura, Minister di Asuntunan Sosial, Kuido di Adulto Mayor i Maneho di Adikshon, Sra. drs. Mervin Wyatt-Ras, a yama e miembronan di Taskforce bon bini ku un diskurso inspirativo ku a enfatisá e poder di kolaborashon i e responsabilidat kompartí di tur isla pa salvaguardá derechi di mucha.
Durante e konsultanan, paisnan Aruba, Kòrsou i Sint Maarten a duna informashon tokante e progreso riba e rekomendashonnan di Komité pa Derechi di Mucha, despues di e oudiensia di 2022. Miembronan a interkambiá tambe riba status di e monitoreo di e plannan di akshon nashonal i a haña oportunidat pa interkambiá ku Comision pa Derechonan di Mucha di Aruba.
E programa a konkluí ku bishitanan opshonal na Skol básiko Dornasol i Skol Dun’un man. Tur dos ta sostené muchanan ku nesesidatnan spesial.
Taskforce a ekspresá gratitut na Gobiernu di Aruba pa su kaluroso hospitalidat i organisashon eksitoso di e reunion. E islanan a reafirmá nan kompromiso konhunto pa garantisá ku kada mucha den Reino por krese sigur, ku oportunidat i akseso igual na kuido, edukashon i protekshon.
Tokante Taskforce
Taskforce di Reino pa Derechi di Mucha a keda instituí despues di e Konferensia di Reino di 2 di april 2014, ku a tuma lugá na Aruba. Taskforce ta promové kolaborashon den henter Reino pa fortalesé implementashon di Tratado pa Derechi di Mucha den e parti karibense di Reino. E ta konsistí di representantenan di Aruba, Boneiru, Kòrsou, Saba, Sint Eustatius, Sint Maarten, i di Ministerio di Asuntunan Interno i Relashonnan den Reino (BZK) i Ministerio di Salubridat Públiko, Bienestar i Deporte (VWS). UNICEF Hulanda ta sirbi komo konsehero di Taskforce.
Press release: Taskforce di Reino
