Diasabra atardi hunto cu un grupo grandi di famia, amistadnan y personan interesa den e facilidad nobo a oficialmente inaugura ThunderBox297. Propietiario Ross Ismail hunto cu su pareha Christy Rodriguez a traha incansablemente duranta e ultimo lunanan pa asina renoba e luga, unda awo tin un espacio functional paden cu tur aparato necesario pa por haci tur tipo di entrenamento, ademas di tin mas di 500m2 di espacio afo cu tin tur ekipo multifunctional pa haci tur tipo di entrenamento, hasta den gruponan.
ThunderBox297 lo enfoka su mes den e desaroyo deportivo, pues ofrece entrenamento pa mehora e capacidadnan di atletanan di tur deporte pa asina mehora e rendimento den nan deporte. Esaki lo wordo haci door di Ross mes, cu tin varios aña ta entrena atleta di tur nivel a traves di su grupo di entrenamento “Crash of Thunder”. Banda di esaki, lo ofrece entrenamentonan tipo HIIT a traves di BanpaBay Personal Training cu tin Christy Rodriguez como entrenadora. Un otro area cu tin disponibel ta e area di Functional Fitness, unda tin tur ekipo necesario pa por haci esaki, hunto cu material pa haci e fenomeno nobo conoci como “Hyrox”. Finalmente lo tin diferente programa pa deportenan di forsa, cu lo wordo maneha door di Paradise Strength Aruba y entrenador Jonathan Wever, cu lo ta encarga cu e entrenamento di Olympic Weighlifting, Powerlifting y Strongman. Claramente e lo ta un facilidad di entrenamento liber tambe unda cu por bin haci bo propio entrenamento utilisando e espacionan.
ThunderBox297 ta invita pueblo di Aruba pa bin haci conoci cu e concepto nobo aki y sinti e diferencia!
