Diaranson trahadonan di sede principal di Biblioteca Nacional na Playa a dicidi di tene un walkout como malcontento. Nan tin basta tempo trahando sin airco. Saliendo pafo nan kier obliga Gobierno tuma un decision den nan caso.
E sindicato cu ta representa e grupo aki, esta TOPA, a dicidi di manda un carta pa Prome Minister di Aruba mr. Evelyn Wever Croes. Nan ta pidi e mandatario intervene den un problema na BNA. Nan ta informa Wever Croes cu Minister demisionario Lampe, mescos cu prome minister, a tuma e decision cu aunke cu no tin airco, e trahadonan mester keda trabou.
Den e mesun carta ey mes ta informa prome minister cu Lampe a duna nan e opcion pa bay n Arubianita of San Nicolas, of haci uzo di e cantina, unda nan por sigui haci un of otro trabou ya cu eynan si tin airco. Sinembargo sindicato TOPA mes ta pidi prome minister pa permiti e trahadonan KEDA CAS, te ora nan por bay bek nan trabou.
Esaki ta un situacion cu solamente den sector gubernamental por tuma luga. E trahadonan a haya opcion, tanto for di e directora como e minister pa sigui haci nan trabou, cual nan ta haya pago p’e. Segun tin entendi, hasta a ofrece cu por traha for di cas, si esaki ta posibel.
Apesar di e opcion, a dicidi walkout y sinta den calor pafo en bes di traha den e areanan unda si tin airco. E problema di airco, segun por a compronde, ta parcialmente debi na e hecho cu te ainda no tin un presupuesto aproba. Diabierna Parlamento lo cuminsa cu tratamento presupuesto 2021. E otro causa ta cu BNA a tarda cu e proceso pa destaho di e airconan.
Segun por a compronde tambe, ya caba e mandatario a manda un carta pa e sindicato mustrando su asombro cu e peticion pa e trahadonan keda cas, cobra y sin traha. E mandatario manera cu el a bisa den diferente di su comentarionan haci, entre otro cu e asunto di SIMAR, cu e ta respeta placa di pueblo. Hamas e lo permiti pa haci mal uzo di esaki. Probablemente, esey ta e motibo tambe cu a dicidi di no permiti e trahadonan bay cas y pa cual e sindicato a dicidi awo di acerca e prome mandatario cu e peticion aki
