Na inicio di siman a tuma luga un incidente cu ta lanta hopi pregunta. Un incidente unda cu asistencia di polis a ser pidi pero pa un motibo of otro, aparentemente, esaki a wordo tapa.
Cerca EANews a yega diferente informacion di algo cu e ciudadanonan ta bisa cu nan ta condena, pasobra ta parce cu Polis ta midi cu dos midi. Segun por a compronde por lo menos dos persona,tabata sinta den e restaurant / lunge Azia, cu ta situa riba e strip di hotelnan, ora nan a haya nan mes ta testigo di algo bochornoso y cu un arogancia, ami ta D. L. Na inicio di fin di siman esaki a tuma luga.
Nan a mira con dos hende muhe a drenta e luga den estado di embriaguez. Pero ta parce cu nan a yega hopi altera y of bao influncia di alcohol y of otro substancia y tabatin problema cu algun otro persona. A cuminsa un discusion fuerte unda cu e dos muhenan aki a cuminsa zwaai tur loke cu tabata na nan alcance y a causa basta daño den e luga. Un di e señoranan aki pa colmo ta un empresario conoci riba e isla den sector di botigue.
Mirando cu no por a controla e dos muhenan aki, a dicidi di yama Polis cu a acudi na e sitio tambe. Esnan responsabel pa e luga a papia cu e funcionarionan policial y a informa nan kico a pasa y cu nan no kier e dos señoranan den e luga pasobra a causa basta daño material.
Pa nan sorpresa a bin tende polis bisa nan pa no preocupa pasobra lo hiba nan cas. E pregunta cu ta surgi ta di con e dos personanan aki cu a causa asina hopi problema ta wordo atende cu handschoen di felpa. Di con no a detene nan y hiba nan warda di polis? Y unda e rapport a keda? Ta hopi pregunta a keda cerca tur esnan cu a presencia e acto bochorno aki.