Merka ta bai hasi uso di kapasidat adishonal di defensa den region surkaribense, den kuadro di kombatimentu di negoshi di droga. Relashoná ku e desaroyo akí gezaghèber John Soliano a tene kontakto ku Ministerio di Asuntunan Eksterior i Ministerio di Defensa.
Informenan resien tokante intensifikashon militar di e merikanonan, a kondusí na preokupashon serka un parti di habitantenan di Boneiru. Gezaghèber Soliano ta aksentuá e importansia di evitá konklushonnan spekulativo i informenan no-verifiká den medionan sosial.
Gobièrnu di Boneiru ta mantené un komunikashon kontinuo i habrí ku ministerio di Asuntunan Eksterior i ministerio di Defensa. Nan ta tene Boneiru na altura di desaroyonan relevante aktual den region ku por tin konsekuensia pa nos isla. Den kaso ku tin informashon òf notisia ku ta di importansia pa komunidat boneriano, entidat públiko Boneiru òf gobièrnu di Reino lo kompartí
esaki ku nos habitantenan via e kanalnan ofisial.
Banda di esaki na e momentu akí un ehersisio militar regularmente planiá ta tumando lugá di e di 49 kompania di ehérsito. E ehersisio militar ta dura for di 19 te ku 26 di ougùstùs 2025 i e tin komo meta pa e unidat siña konosé Boneiru su bisindarionan i pa fortifiká e kolaborashon ku outoridatnan i servisionan ousiliar lokal.
Konforme tradishon, e komandante di e unidat lo hasi un bishita di kortesia serka gezaghèber