Den un momento decisivo pa e futuro constitucional y financiero di nos pais, un yamada directo ta ser haci na Staatssecretaris Eric van der Burg. E mensahe ta contundente: Aruba a keda for di necesidad di bishitanan di caracter “cosmetico” of e imposicion di proyectonan cu no ta forma parti di loek pueblo a pidi pe. Loke na e momentonan aki taun exigencia, ta claridad absoluto riba e maneho cu Hulanda ta implementando, y mas importante ainda, e publicacion inmediato di e documento real cu a sirbi di base pa e actual Rijkswet HOFA.
E diferencia fundamental: Bestuurlijk Akkoord vs. Rijkswet
Pa hopi tempo, e discusion publico a keda concentra riba e Bestuurlijk Akkoord. Sinembargo, mester haci un distincion legal y politico critico: un Bestuurlijk Akkoord no ta un Rijkswet. E acuerdo administrativo tabata apenas un punto di salida, un fase inicial cu a perde su balor y relevancia legal despues di 1 di mei 2025.
E enfoke mester desplaza awor pa e documento real y definitivo cu a surgi despues di e negociacionnan ey, y cu a cristalisa den e Rijkswet cu e gobierno di AVP-Futuro ta sostene awe y a firma pe. E pueblo tin derecho di sa kico ta e “letra chikito” di e acuerdo cu ta mara nos pais pa añanan largo.
Fracasos y falta di transparencia den gobernacion
E situacion actual ta lanta preguntanan serio tocante e capacidad di negociacion di e gobierno di AVP-Futuro pa defende autonomia di Pais Aruba. E inabilidad di e gabinete actual pa saca e documento real riba mesa ta ilustra un falta di direccion y un falta di respet pa e integridad di pueblo di Aruba.
Kico exactamente a ser negosha den e documento final? Parlamento, e pueblo y e sindicatonan cu a vocifera repetidamente nan rechaso contra e direccion forsa di HOFA, tin derecho di conoce e contenido real. E gobernacion di un pais no ta un wega di azar, y e siguridad di e gobierno di AVP-Futuro pa sconde e documentacion firma door di nan, aki ta un ofensa na nos democracia.
Trias Politica y e “liña di dictadura”
Nos ta observando movecionnan preocupante unda cu interesnan comercial ta ocupa stoelnan politico, pasando e liña di e Trias Politica. Politica y comercio ta dos poder cu mester keda rigorosamente separa pa evita cualkier apariencia di conflicto di interes of, den casonan extremo, un deriva den direccion di dictadura. Ta necesario pa puntra: kico ta e nomber di e practica aki unda e liñanan ta birando asina difuso?Histeria ta ripitiendo, kico realmente tabatin achter de comma?
Yamada na Staatssecretaris Van der Burg
Den e dianan nos dilanti, e Staatssecretaris lo bishita Aruba. Aruba no ta den necesidad di mooie praatjes ni “cosmetica”. Nos no ta desea trocemento di historia ni presentacion di proyectonan cu pueblo NUNCA a pidi pe.
Aruba a papia cla y raspa: No na HOFA na e manera cu e ta actualmente . Cu Aruba kier supervicion finansiero SI y hopi mas supervicion finansiero si ta necesario, Ki dia Hulanda ta cuminsa respeta e boluntad di e pueblo di Aruba?, en bes di sostene e decisionnan di un grupo reduci den gabinete AVP-Futuro? E pueblo no a duna mandato pa e tipo di gobernacion aki.
Transparencia no ta un opcion, ta un obligacion. Aruba ta exigi e documento final riba mesa. E tempo pa e weganan di “cosmetica” a caba; awor ta tempo pa e berdad.