Esaki ta ultimo siman pa pueblo por cumpra su rifa ainda di Aruba Lions Club.
E rifa aki a mustra di ta hopi atractivo y tin hopi interes pa esaki mirando cu pa 25 florin bo tin chance di gana 5 premio cu ta cu cooperacion di e compania All to Car, cu a juda Aruba Lions Club cu nan producto di transporte electrico.
Cuminsando cu e premio 5, cu ta un auto pa mucha cu ta core cu bateria, nr 4 ta un Step electrico, nr 3 ta un bicicleta electrico, nr 2 ta un scooter electrico y asina jega na e premio grandi cu ta un auto electrico di 4 porta marca Changan.
Aruba Lions Club e siman aki lo ta diferente parti riba camindanan grandi pa pueblo por pasa y cumpra nan rifa, mescos esaki ta obtenibel na Technodent na Sanicolaas, Amistad Take Away na Sta Cruz, Mandingo’s Snack, Universal Technology den Cayena Mall, na New 88 food mart na Paradera, diferente lugarnan di number y tambe pump station nan riba nos isla.
Esaki sigur ta obtenibel serka tur miembronan di Aruba Lions CLub tambe.
E rifa lo tuma lugar diadomingo dia 6 di November 2022 den un grandioso actividad durante dia cuminsando pa 12or di merdia cu musica di diferente gruponan di gaita, tambe lo bai tin un tremendo car show di autonan clasico cu lo wordo staciona dilanti di e club di leonnan na Eagle den Engelandstraat, dilanti Eagle Tennis Club.
Riba e dia aki lo tin un bar y cushina bon surti y e caminda lo wordo sera pa asina e actividad por tuma lugar unda cu Aruba Lions Club kier a invita pueblo en general pa bin goza di e dushi ambiente di fin di aña y duna bo sosten na Aruba Lions Club cumprando e rifa pa asina nan por sigiu juda esnan den nececidad den nos comunidad.
E actividad lo culmina pa 6or di atardi caminda lo saka e rifa pa mira ken ta e ganadornan di e diferente premionan y ta ken lo ricibi su auto electrico nobo nobo.
Den cuadro di e celebracion di 75 aña di Aruba Lions Club, nan ta invita pueblo en general pa celebra esaki hunto cu nan dilanti di nan club y cu e chance pa finalmente gana fabuloso premionan.
