Evento Corporativo Anual di ATIA no a desapunta
Cu tema: Culture of Purpose
Diabierna anochi Aruba Trade & Industry Association (ATIA) a tene su Annual Corporate Event pa 2022. E anochi a tuma luga den instalacionnan di Hyatt Regency Resort, Spa & Casino caminda lidernan comercial, empresario y profesionalnan di Aruba a disfruta di un anochi di conocemento, pero tambe networking. Entre e puntonan mas importante di e evento tabata e presentacion di director di Censo, Sharin Luydens y orador internacional LaMarque D. Ward Sr.
Tabata e prome biaha cu Luydens ta duna un presentacion na publico y el a cay den masha bon tera caminda tabatin varios pregunta y hasta e propio Ward Sr. a pidi e sala pa duna e director di Censo un standing ovation. Luydens tabata hopi directo den su comunicacion, splicando cu su tipo di maneho ta basa riba planificacion, integridad y e satisfaccion di e cliente na prome luga.
Luidens: “No ta imposibel pa logra un organisacion publico productivo y bo mester busca pa bo ta orguyoso di loke bo organisacion ta contribui na sociedad. Nos tur como ciudadano tin e co-responsabilidad di promove e balornan pasobra e ta unico manera di alcansa un gobierno y servicionan efectivo.”
LaMarque D. Ward Sr. a contrasta hopi den e manera cu el a trece su mensahe dilanti. Tabata un estilo mas di relata storia y experiencianan. Entre su argumentonan di mas memorabel por menciona cu e proposito di negoshi ta pa pusha humanidad bay dilanti. Tambe a splica cu hefe y empresarionan no ta doño di nan empleadonan. Mas bien, mester yuda nan kere den nan mes pa nan por wak den spiel un persona cu nunca nan a yega di wak prome. Finalmente a comparti cu e audiencia cu bo no por tin un cultura di proposito sin e elemento di amor.
Tras e presentacionnan, e di dos parti di e anochi a continua cu un coctel sigui pa un esfera masha agradabel caminda di manera casual miembro y miembronan potencial di e organisacion por a haci networking, fomentando asina oportunidadnan comercial, como parti clave di e evento. E anochi a finalisa cu mini N’Fuzion cu a toca un repertorio varia pa e participantenan.
ATIA ta yama danki na tur su patrocinadornan cu a haci e e Annual Corporate Event posibel. Nan ta: Setar, Banco Central di Aruba, CMB, Romar Trading, JDB, Aruba Tourism Authority y DOC Opleidingen.
