Ayera a drenta un notifikashon na Sentro di Reskate i Kordinashon (RCC) di Wardakosta via di Pòst Sentral di Polis. Un dama su man a pega entre un kabuya riba un boto di charter ku tabata mara na Klein Kòrsou. E persona ku a bati alarma a pidi asistensha di helikòpter di Wardakosta pa transportá e dama aki mas pronto ku ta posibel pa hospital pa asina risibí tratamentu médiko.
RCC a laga e helikòpter bai Klein Kòrsou buska e dama einan despues di kua a transport’é pa Hato. Na Hato tabatin un ambulans ta warda pa transportá e dama pa hospital; e dama tabatin heridanan i kontushon na man i dede. Wardakosta ta deseá e señora pronto rekuperashon.