Awe mainta te den oranan di merdia, den Corte di Husticia a trata e caso penal cu Ministerio Publico a cuminsa contra Israel Paesch (40), acusa cu riba 23 Augustus 2025 a tira mata su primo Rene Paesch.
Por a compronde cu Fiscal ta haya cu Israel a provoca Rene pa bay na Israel su cas y asina a tir’e mata. Fiscal a tene cuenta cu raport di psycologo y psychiater cu ta mustra cu Israel ta menos responsabel pa e tiramento y a exigi 13 aña di prison.
PELEA NA LEKKER BAR
E anochi di 23 Augustus 2025, Israel a sali cu e dama M. E dama M. a bisa cu Israel a bebe algun cerbez y a conta su problema. Despues den careda di 4’or di marduga, nan a bay Lekker Bar y ora nan a sali banda di 5’or un hende a bay maltrata Israel formal y despues Israel a bay cas. Israel a bisa Hues cu e no ta corda mucho cos. El a bisa cu door di e maltrato, el a perde conocimento y ora el a spierta el a mira cu ta Rene. El a bisa cu di sorpresa Rene a bay maltrat’e. Hues a puntra Israel si tabatin papiamento entre nan. Segun Israel e no ta corda no mucho bon, pero cu el a bisa Rene pa stop di maltrat’e. El a bisa cu e no ta corda con el a yega na cas di M. Israel a bisa Hues cu tres biaha el a sufri hemoragia celebral door di maltrato. Hues a bisa cu segun camera di seguridad, 5.22 di mainta, Rene a subi su brommer y bay for Lekker Bar. Hues a sigui bisa cu segun investigacion di Polis riba cellular di Israel, 5.36 di mainta, Israel a yama un homber A. Segun Israel, e homber M. a bay busk’e despues di e tiramento pa e bay sconde den mondi. Hues a mustra cu segun investigacion di Polis, Israel a bisa e homber A. pa yud’e y busk’e pasobra Rene a bolbe maltrat’e. Segun Israel e no ta corda esey. El a bisa cu e ta corda cu M. a bay busk’e y hib’e sconde den un mondi.
TIRAMENTO NA SABANIA ABAO
Hues a bisa cu e dia ey mainta tempran tabatin tiramento riba un cas na Sabania Abao. Esey tabata e cas cu Rene tabata cuida pa e homber G.C. cu tabata na Colombia. Israel a bisa Hues cu e no sa esey. Hues a mustra cu tin diferente testigo cu a bisa cu tabata despues di 5’or di marduga cu nan a scucha tiramento. Despues nan a mira e auto di Israel y despues Rene y un otro brommer. Polis a bay na e cas y a mira 5 impacto di bala y a haya 3 huls. Investigacion ta mustra cu e huls ta parce di e arma cu Israel a tira Rene. Hues a bisa cu esey ta crea e pensamento cu Israel lo a tira riba e cas na Sabania Abao. Segun Israel e no sa nada di esey.
Israel a bisa cu e tabatin e pistool mas o menos 6 luna. El a busca e pistool door cu e tabatin miedo pa su bida. El a bisa Hues cu un hende a ofrece e arma y el a cumpra esaki. El a bisa cu e arma tabata na su cas scondi bou di un boter di gas. El a bisa cu nunca el a bisa hende cu e tin un arma.
Hues a bisa cu segun investigacion di Polis e pistool ta e mesun arma di Israel a tira na e cas na Sabania Abao. Israel a bisa Hues cu e no ta corda si e lo a usa e arma. El a bisa cu e sa cu el a usa e arma na su cas. Israel a bisa cu ora el a hiba e dama M. su cas, el a mira e pistool den auto. El a bisa Hues cu hopi biaha Rene ta bin su cas cu otro hende cu arma. Hues a puntr’e si el a haci denuncia na Polis. Segun Israel, e tabata pensa cu si e bay haci denuncia, e problemanan ta bira mas grandi. El a bisa Hues cu esey tabata e fayo cu el a haci, di no a haci denuncia na Polis. Israel a bisa Hues cu unda Rene mir’e, Rene ta bay maltrat’e.
Hues a bisa cu tin imagennan di diferente ruta cu Israel a core e mainta ey. Hues a bisa cu for imagen di camera na Coba Lodo cu ta pega na cas di Israel, Rene lo tabata sigui tras di Israel. Israel a bisa Hues cu e no ta corda nada di esey.
TIRA PRIMO MATA
Hues a bisa cu na Coba Lodo na cas di Israel, e tiramento di Rene a sosode. Hues a puntra Israel kico a pasa. Israel a bisa cu e tabata den su auto para y a scucha Rene ta grita. Ora el a sali, Rene tabata patras di e auto. Segun Israel, ainda e tabata na sanger di e maltrato di Lekker Bar. El a bisa Hues cu Rene a bis’e cu awor e lo mat’e. Israel tabatin e arma den man y a tira Rene. Hues a puntra Israel si el a mira Rene cu un arma. Segun Israel, e sa cu Rene ta cana tur ora arma y e ora ey el a pensa; of te of ta Rene. E tabata mira e parti ariba di Rene y no a tuma chens y a tira. Ta asina cu e momento ey Rene no tabatin arma cun’e. Segun Israel, Rene a sigui cana bin riba dje y nan a cuminsa bringa. E momento ey e ruman homber di Israel, G., tabata grita pa stop. Segun Israel, e momento ey e no tabata sa cu el a herida Rene pasobra e no a mira sanger.
Hues a puntra Israel si el a bringa pa caba cu Rene of pa defende su mes. Segun Israel, el a bringa pa defende su mes.
Hues a bisa cu e ruman di Israel, G. a bisa Polis cu el a tene tiramento y a sali pafor. El a mira dos hende tabata bringa. El a mira Israel tabata riba Rene. El a coy e pistool for di Israel y pone riba haula di galiña. Un otro testigo, dama, a bisa cu el a tende 3 tiro y a bay wak. El a mira un brommer sendi y benta abao. El a mira Rene riba suela y G. y Israel tabata bati Rene. El a grita nan, kico nan tabata haci. E ora ey nan a stop. El a mira cu Rene tabatin slanan na cara y tabata hala rosea pisa. El a bay paden pa coy cellular y yama Polis. El a mira Israel a bay paden y bolbe pafor y bay riba Rene y maltrat’e atrobe. Despues el a scucha Israel bisa: “mi a mat’e”. Ora e dama a bay serca Rene, el a mira cu e tabata hala ultimo rosea y fayece.
CAMERA DI POLIS A FILMA
Hues a bisa cu ta asina cu den vecindario Polis tabatin camera ta graba y scucha relaciona cu un observacion den vecindario y pa casualidad a graba tur cos. E observacion di Polis tabata riba bendemento di droga. For di e camera a mira momento cu e auto di Israel ta yega cas y algun seconde despues e brommer di Rene ta yega y ta cay y despues ta scucha 4 tio. Hues a bisa cu e por ta posibel cu Israel a yega cas, bay coy e arma, bay bek na e auto y ora Rene a yega, el a tira. Hues a bisa cu for di grabacion di sonido por scucha cu e brommer ta slip riba tera y cay y e motor a keda traha. Despues ta scucha Rene ta bisa: “tira mi no, tira mi”. Tin combersacionnan caminda a scucha e dama ta grita Israel y ta scucha Israel bisa: “Mi ta mata bo gayo”. Tambe a scucha mas discusion. Ta asina cu Israel mes a yama Polis. Hues a bisa cu e ruman di Israel, G. a bisa cu el a kita e arma for di Israel y pone riba dak di un haula di galiña. El a mustra Polis caminda el a laga e arma y Polis a haya e arma. Polis a constata cu Rene tabatin slanan na cabez y tabata falta diferente djiente.
Segun patologo, tabatin 3 tiro cu a causa sangramento paden. Patologo a sigui bisa cu lo a usa e pistool tambe pa dal e victima riba cabez mientras cu e tabata na bida ainda. A haci investigacion di DNA y no a haya DNA di G. riba Rene.
Polis a constata cu tin marca di polvora riba man di G. Hues a bisa cu probablemente esaki ta momento cu G. a coy e arma y pone riba haula di galiña.
PROBLEMA DI ASALTO Y DEBE PLACA
Segun Israel, e problema entre e y Rene ta relaciona cu un asalto na 2018 y e placa cu mester a reparti. Israel a sali for di KIA promer y despues cu Rene a sali. Ta trata di 3500 florin cu segun Rene, Israel mester dun’e. Segun Israel, Rene a keda insisti riba esaki y caba vez tabata maltrat’e. Tabatin tiramento di palabra caba for den KIA na 2018 y tambe confrontacion na Well Well, algun luna despues na Casuela y ultimo na Lekker Bar. Segun Israel, ta duele hopi loke a sosode. El a bisa Hues cu e tabata papia cu amigonan pa busca un manera pa stop e problema. El a bisa cu hendenan tabata mira dos primo ta bringa cu otro. Hues a remarca cu Israel mes a bisa cu el a busca un arma pa defende su mes, cu esey ta mustra cu e tabata prepara. Segun Israel, dos biaha nan a tira riba su cas y e tabatin miedo pa su bida.
DROGA
Hues a bisa cu den cuadra di e investigacion, Polis a haya 465,2 gram di cocaina na un apartamento na e cas unda Israel ta biba. Segun Israel, e droga no ta di dje. El a bisa Hues cu el a duna un pareha cu ta papia Spanjo lift den oranan di anochi y su siguiente dia el a haya un tas cu droga den e auto. El a hiba esaki warda den e apartamento. Hues a bisa cu e ta haya esaki hopi straño. El a puntra pakico Israel no a hiba e droga na Polis. Segun Israel, e no kier a bay pasobra Polis ta bay interog’e. El a bisa Hues cu el a faya den esaki. El a sigui bisa cu el a sconde e sakitonan di droga na diferente parti den e apartamento y no tabatin ningun intension cu esaki.
MENOS RESPONSABEL PA SU ACTO
Ta asina cu ya caba Israel tin 10 luna sera. Na 2018 el a wordo condena na 5 aña di prison pa asalto cu arma di candela. Door di e caso aki, a bin conflicto entre Israel y Rene. Ta asina cu psycologo y psychiater a traha un raport di Israel. Nan ta mustra cu su Israel su infancia tabata dificil door di instabilidad den relacion na cas. E expertonan ta mustra cu esey ta motibo cu Israel tabatin hopi dolor di cabez. Nan a constata cu Israel tin problema mental anti social caminda e no por atene na palabracionnan. Ora e haya situacion anti social e ta haya impulso. E expertonan a conclui cu Israel ta menos responsabel pa loke a sosode. Nan a mustra cu humamento di marihuana y uso di alcohol a hunga un rol grandi den esaki. E expertonan ta haya cu Israel mester di tratamento bou guia di Reclasering.
Israel a bisa Hues cu e ta hopi preocupa pa su yiu muher cu awor tin 9 aña. Promer cu el a entrega na Polis, el a bay papia cu su yiu pa bis’e cu e no por cumpli cu su promesa di cuid’e. Awor e yiu ta biba serca e mama di Israel y ta bishita Israel na KIA. Hues a mustra cu Israel a bisa psychiater, e ta dispuesto pa sinta 8 aña di prison pa loke el a haci. Israel a bisa cu ta berdad y cu e ta hopi preocupa pa su yiu.
DEMANDA DI DAÑO
Abogado mr. Ras, kende a representa e ruman muher, M., di e victima Rene, a demanda 9075 florin di gasto di entiero, 10 mil florin pa shock cu M. a sufri ora el a tende cu nan a tira su ruman mata y 2 mil gasto di abogado. E abogado a bisa cu no por a presenta lista pa cu gastonan di psycologo, pasobra ainda no a haya cita. Abogado mr. Ras a bisa Hues cu M. a bay Coba Lodo pa mira unda nan a tira su ruman Rene mata y a bay hospital pa mira e curpa di su ruman. E abogado a bisa cu esey a causa cu M. a keda den shock.
FISCAL A EXIGI 13 AÑA DI PRISON
Fiscal a bisa Hues cu ta proba cu dia 23 Aug 2025, Israel a tira su primo Rene mata. Fiscal a mustra cu tabatin diferente yamada cu ta bisa cu tabatin tiramento na Coba Lodo. Polis a bay y haya Rene drumi abao morto. Tin hende a bisa cu e ruman di Israel, G., tambe a bringa cu Rene. A detene G. pa investigacion y despues lag’e bay. Israel mes a bay for di e lugar y despues a entrega su mes. Fiscal a bisa cu investigacion ta mustra cu Rene a sufri dos tiro den pecho y un den man robez. Patologo a mustra cu door di sangramento paden, Rene a fayece. Tambe cu tabatin slanan na cabez y un djiente a kiba y bay den un pulmon. Un tiro a performa un pulmon. Tin indicacion cu lo a maltrata Rene cu e cabo di e pistool na su cabez. Fiscal a bisa cu ta un hecho cu Israel y Rene tin conflicto cu otro relaciona cu un asalto arma. Segun Israel, Rene a sende su boto na candela y dos biaha a tira riba Rene su cas. Na opinion di Fiscal, di otro banda tin indicacion cu Israel a maltrata Rene cu glas na cara algun aña pasa. E ruman muher M. a presenta prueba di esaki.
ISRAEL A PROVOCA RENE PA ASINA TIR’E MATA
Fiscal a mustra cu 23 Augustus 2025, Israel tabata na Lekker Bar y a wordo maltrata door di Rene ora cu Israel tabata den auto. Israel a hiba e amiga M. cu kende e tabata, cas y despues a sosode e tiramento na cas di Israel. Fiscal a splica cu Polis tabatin investigacion riba bendemento di droga banda di cas di Israel. Tabatin aparato special ta filma y scucha combersacionnan. Aki a scucha combersacionnan di Israel y tambe movecionnan cu Israel den auto dilanti su cas. Na opinion di Fiscal, esaki ta indicacion cu Israel a bay busca e pistool. Tabatin tiramento na e cas na Sabania Abao. Despues na Coba Lodo ta mira auto di Israel ta para dilanti cas y tambe e brommer di Rene. Investigacion a mustra cu e impactonan riba e cas na Sabania Abao ta cuadra cu e pistool di Israel. Fiscal ta haya cu tur e movecionnan aki ta mustra un acto di venganza di parti di Israel na Sabania Abao. Despues na e cas di Israel na Coba Lodo.
Riba imagennan di camera di investigacion por mira cu Israel ta yega su cas y despues di un rato Rene ta yega riba brommer. Por a scucha Rene bisa: “no tira mi”. Un rato despues ta scucha 4 tiro. Despues a scucha Rene bisa: mata mi. Despues ta scucha slanan cu G. y Israel tabata dal Rene. Segun Fiscal, tin indicacion cu Israel a dal Rene cu e arma na su cabez. Israel mes a bisa cu e tabatin e arma y por ta el a dal Rene cu e arma. Fiscal a mustra cu Israel mes a yama Polis cu telefoon di su mama. Investigacion a mustra cu e yamada lo mester tabata despues cu Israel a tira Rene. Fiscal ta mustra cu tin indicacion cu intencional Israel a tira Rene. Israel a bisa cu e tabatin miedo cu Rene lo mat’e. Durante e pelea por a scucha Israel bisa Rene, mi ta mata bo. Fiscal a bisa Hues cu e no ta haya cu Israel tabatin plannan y pesey no por papia di asesinato, pero si di a mata. Israel tabatin arma di candela y e ruman G. a mustra Polis unda el a pone e arma cu el a kita for di Israel. Fiscal a sigui bisa cu Polis a haya 465 gram di cocaina den apartamento di Israel. Fiscal a bisa cu e no ta kere storia di Israel cu un pareha di habla Spaño a laga e droga den su auto. Fiscal ta haya cu den e caso di tiramento no por papia di cu Israel a actua den defensa propio. Fiscal ta haya cu ta Israel mes a busca e confrontacion. Despues di e problema na Lekker Bar, Israel a tuma venganza contra Rene y a provoca Rene. Fisal ta haya cu Israel mes a bay tira riba e cas na Sabania Abao y provoca Rene pa bay na cas di Israel. Fiscal a mustra cu Israel por a los tiro di advertencia, core bay, yama pa ayudo. Pero Israel a los 4 tiro riba e parti ariba di curpa di Rene. Fiscal a bisa cu e ta tene cuenta cu e raport di psycologo y psychiater. El a exigi 13 aña di prison pa Rene y cu mester ordena Rene paga e daño di 11 mil florin y pone medida di pago.
Hues, despues di a scucha e defensa di abogado, a bisa cu 10 Juli 2026 lo bay dicta sentencia.