Diasabra ultimo a sali pa promer biaha den publico e trio “297 Strings” cu e debuta den un bon ambiente na “The Old Cunucu House
Restaurant” na Palm Beach.
Un restaurant completamento jen cu tanto localnan y tambe turista por a disfruta di un tremendo anochi na momento cu e trio
“297 Strings”, Andy, Ivan y Rubin a cuminsa resona nan dushi musica instrumental y relahante.
Por a scucha diferente bon comentario di e musica presenta, caminda tur presente por a sinta combersa y scucha e musica den fondo y
cu e variacion musical di e diferente genero y typo di musica presenta cu tin pa gusto di un y tur.
Nos por a presencia parti di e presentacion aki cu en berdad ta un trio cu un musica hopi diferente y cu un repertorio hopi varia
pa complace tur hende cu ta gusta musica.
Den un combersacion cu e integrantenan nos a compronde cu e concepto aki ta pa presenta specialmente den lugarnan cu mester di e
musica di fondo manera reastaurantan, cocktail party, actividadnan ceremonial manera apertura di cualkier edificio of lugarnan
comercial y muchu mas.
Ta locual nos isla falta den musica ta exactamente locual e grupo aki a bin ta ofrece, y sigur den un formato unico.
Nos a compronde cu ja e trio aki a cuminsa ricibi peticion pa algun presentacion den e diferente cenanan di Pasco cu den e proximo
simannan nan lo bai presenta.
E trio aki tin un videoclip cu musica di fin di aña riba youtube y proximamente pa e temporada aki tambe lo lansa nan segundo videoclip.
Nos kier a desea e trio aki hopi exito y cu nan por sigui mantene nos musica y cultura bibo den nos comunidad.
Pa cualkier informacion por jama 7301214 y pronto nan lo tin nan pagina riba facebook.
