KvK a invita henter Parlamento di Aruba pa un reunion, un invitacion cu a wordo extendi despues di un reunion cu gremionan comercial den sala di parlamento e mesun dia. Parlamentario Evelyn Wever-Croes, Rocco Tjon y Dangui Oduber a acepta e invitacion pa asisti na e reunion unda gremio comercial lo scucha presentacion di Minister Wever y unda nan lo por comparti nan bista y posicion riba e Rijkswet Financieel Toezicht Aruba (HOFA).
Como representantenan di pueblo di Aruba, y como fraccion cu desde e prome dia a para na banda di pueblo cu a rechasa HOFA masalmente, nos a considera esaki un oportunidad legitimo y necesario pa scucha directamente e perspectiva di e sector comercial riba un asunto cu ta afecta nos autonomia como pais.
Na nos yegada na KvK, nos a wordo ricibi cu un caluroso bon bini. Tur cos a cambia ora Minister di Finansa Geoffrey Wever a yega. E minister a exigi formalmente di e board di KvK cu nos — representantenan di pueblo di Aruba — mester bandona e auditorium. Su menasa tabata cla: si nos no sali, e no lo duna su presentacion. E board di KvK, poni on the spot y bou presion di e minister, a cumpli cu e exigencia. Nos a respeta e decision di e board y nos a sali di forma digno y sin incidente.
Sin embargo, nos no por keda keto riba loke a pasa awe.
Un minister di finansa cu ta uza su posicion gubernamental pa exigi e exclusion di parlamentario den sala, den un espacio civil y independiente, riba invitacion di e instancia mes, ta cruzando un liña importante. Esaki no ta un asunto di protocol of preferencia personal. Esaki ta un cuestion di principio democratico.
Nos kier ta cla riba un punto: nos no tabata eynan pa confronta e minister. Nos tabata eynan pa scucha e gremio comercial, exactamente pa loke KvK a invita nos. Minister Wever mes a conberti e situacion den un confrontacion door di exigi nos salida.
Y esaki nos laga un pregunta colga pa pueblo di Aruba:
Si HOFA ta asina bon pa nos pais, pakico e minister di finansa no por defend’e den presencia di representantenan di e mesun pueblo cu e ta goberna?
Un berdad cu ta fuerte no tin miedo di pregunta. Un minister cu ta convenci di su caso no tin cu silencia e oposicion pa presenta su caso.
Pa esaki, nos ta exigi Minister Wever pa — si e realmente kier ta transparente — no solamente papia di e beneficionan di HOFA, pero tambe papia abiertamente di e prijs cu nos como pais mester paga. Papia di loke nos ta perde. Papia di loke nos tin cu entrega. Papia di e consecuencianan pa nos autonomia, pa nos finansas, y pa nos pueblo.
Transparencia real no ta selectivo. Un gobierno cu ta goberna pa pueblo no tin cu scoge kico pueblo por scucha y kico no.
Nos ta urgi Minister Wever pa haci su presentacion riba HOFA disponibel publicamente, tur e cifranan, tur e argumentonan, tur e proyeccionnan, pa cada ciudadano por husga pa nan mes. Si e ta convenci cu HOFA ta den e miho interes di pueblo di Aruba, laga pueblo husg’e.
Fraccion MEP lo sigui para firme pa e derecho di pueblo di Aruba pa sa, pa scucha, y pa participa den decisionnan cu ta afecta nan futuro.