ORANJESTAD,Aruba
Prome Minister Evelyn Wever-Croes a haci un bishita na e muchanan di klas 6 di Cacique Macuarima pa mira e avancenan den e proyecto piloto di innovacion den enseñansa cu ta wordo guia door di FUTURA. Prome Minister a wordo ricibi pa cabesante Juffrouw Rachelle Croes-Caster y cu entusiasmo door di alumnonan di scol bou reglanan di distanciamento social pero no a falta e saludo y abraso di leu entre Prome Minister y muchanan.
Recientemente, Cacique Macuarima a haya virtual reality goggles. E scol ta hayando training di e uzo di esaki den enseñansa pa asina pronto por cuminsa duna les tambe den dje. VR goggles ta duna imagen den tres dimension y por ofrece experencia di les na nos muchanan den forma mas visual y nan por siña mas lihe. Esaki ta un paso mas den e proyecto di innovacion na scolnan.
Prome Minister a desea e muchanan di klas 6 tur exito den nan scol nobo y a recorda nan cu e futuro ta den nan man y pa nan haci lo miho cu nan por ta den loke cu nan dicidi. 
