Crisis Team di Gobierno ta informa cu debi na e variante nobo di Covid-19 corona virus na Brazil y cu ta circulando tambe den Sur America; aerolineanan ta cancelando vuelonan for di destinacionnan di sur America. E medida aki ta pa blokea entrada di e variante nobo di Brazil den nan pais. KLM a laga su cu nan tambe a tuma medida y a cancela vuelonan procedente di Sur America, sinembargo nan lo sigui bula pa Caribe Hulandes; Aruba, Corsow, St. Maarten y islanan BES. Crisis Team ta pidi tur hende pa keda pendiente y sigi e noticianan den media pasobra e maneho por cambia na cualkier momento. Aruba lo sera frontera pa ciudadanonan di Brazil entrante dialuna 25 di januari. Actualmente frontera di Aruba ta sera pa Venezuela y Peru. Si bo ta biahando pa Merca of cualkier otro destinacion, sea consciente cu autoridadnan por sugeri of exigi pa bo bay den cuarentena ora cu bo yega, apesar cu bo a test negativo. Esaki lo complica e biahe pa cualkier pasahero, hasta cu bo tin chens di keda pega den exterior. Crisis Team ta sigui monitor e situacion y lo informa comunidad di Aruba di cualkier desaroyo corespondiente.
