Biaheronan ku ta bula di Hulanda pa Boneiru denter di poko mester hasi un tèst di PCR i un tèst antigéniko obligatorio promé ku salida. Un tèst antigéniko ta un tèst rápido, e tèst ta indiká si tin proteina di vírùs den sleim den nanishi i garganta. Hulanda ta un pais di riesgo haltu pa Boneiru. Pasaheronan for di Boneiru ku ta biaha pa Hulanda no mester hasi un tèst di PCR i tèst antigéniko promé ku salida, pa Hulanda Boneiru ta un pais di riesgo abou. Biaheronan for di paisnan di riesgo haltu manera Merka i Canada ku ta bula pa Boneiru, si mester hasi un tèst di PCR i e tèst antigéniko entrante 23 di yanüari 2021.
Probablemente ta dura dos siman promé ku introdusí e kondishon pa un tèst antigéniko pa biaheronan for di Hulanda pa Boneiru. Esaki pasobra mester adaptá e areglo ministerial promé. I esei ta tuma mas o ménos dos siman. P’esei no ta konosí ainda for di ki dia e tèst antigéniko ta bira obligatorio pa biaheronan for di Hulanda pa Boneiru. E biaheronan akí mester hasi e hasi e tèst di PCR maksimalmente 72 ora promé ku yegada na Boneiru i maksimalmente kuater ora promé ku salida e tèst antigéniko. Nan mester yena un deklarashon di salú di e departamento di Salubridat Públiko pa mas tardá 72 ora i no mas lat ku 48 ora promé ku salida.
For di 23 di yanüari 2021 Hulanda ta introdusí un prohibishon di buelo pa Reino Uní, Suramérika i Suráfrika, komo ku den e paisnan ei tin hopi kontaminashon ku e vírùs di corona modifiká. E prohibishon di buelo pa e paisnan ei ta konta tambe pa buelonan pa Boneiru. E paisnan pa kua e prohibishon di buelo ta konta ta: Reino Uní, Kabo Verde, Suráfrika, Argentina, Bolivia, Brazil, Chile, Colombia, Ecuador, Guyana Franses, Panama, Paraguay, Perú, Sürnam, Uruguay i Venezuela. Riba e wèpsait www.bonairecrisis.com por lesa for di djabièrnè 22 di yanüari 2021 pa kua pais e prohibishon di biahe ta konta i kua pais ta konsiderá komo pais di riesgo abou. Pa biaheronan for di e paisnan di riesgo haltu ta konta e tèst di PCR i e tèst antigéniko obligatorio.
Pa pasaheronan for di Kòrsou, Aruba i Sint Maarten ku ta bini Boneiru, nada no ta kambia. Ketu bai nan mester hasi un tèst di PCR pa mas tardá 72 ora promé ku yegada na Boneiru i yena e deklarashon di salú di Salubridat Públiko digitalmente. Pasaheronan for di Saba i Sint Eustatius ku ta biaha pa Boneiru, mester yena solamente e deklarashon di salú di Salubridat Públiko digitalmente bou di e kondishonnan ku ta konta pa esei.
Despues ku Hulanda a anunsiá e prohibishon di buelo, KLM a duna di konosé den medionan di komunikashon ku e kompania for di 23 di yanüari 2021 no ta hasi buelo interkontinental mas. Segun KLM ta imposibel pa loke ta trata e buelonan akí, pa na regreso laga e personal di buelo hasi e tèst antigéniko. Pero na regreso for di Boneiru pa Hulanda, personal di e kompania no mester hasi un tèst antigéniko komo ku Boneiru ta un pais di riesgo abou. Te ku awor no ta kla si e kompania di bèrdat ta para e buelonan interkontinental.
