Por lo pronto ZJCN ta sigui kolaborá ku BonLab

Despues di 1 di yanüari tambe Kuido i Hubentut Hulanda Karibense
(Zorg en Jeugd Caribisch Nederland – ZJCN) ta sigui hasi uso di e servisionan di
BonLab. A disidí esaki despues ku gerensia di ZJCN a konsultá ku Kolegio
Ehekutivo di Entidat Públiko Boneiru.
Komo akshonista Kolegio Ehekutivo a bai den konsulta ku gerensia di ZJCN
despues ku ZJCN a manda un karta pa BonLab. Den e karta ZJCN a indiká ku
entrante 1 di yanüari nan ta stòp ku atkisishon di investigashon poliklíniko di
laboratorio na BonLab. Awor akí esaki no ta e kaso mas. Despues di e konsulta
ZJCN a disidí pa retirá e karta ku nan a manda pa BonLab luna pasá.
Ámbos partido, Entidat Públiko Boneiru i ZJCN pues, ta mira importansia di un
proseso transparente ku ta bon sinkronisá ku tur partido enbolbí. Pa esaki tin
mester di mas tempu. A palabrá ku lo konsiderá e karta di ZJCN di 21 di òktober
2021 pa BonLab komo no mandá. ZJCN lo manda un karta nobo ku den esei
klaridat tokante e prosedura i un liña di tempu nobo. Adelantá lo konsultá tokante
esaki ku Kolegio Ehekutivo.