E situacion di bida social y economico na Aruba ta sigui deteriorando. E tendencia negativo cu a wordo señala dor di Banco Central di Aruba na 2018-2019 – hopi prome cu e pandemia di COVID 19, ta continua. E maneho di medidanan cu ta pisa hopi riba comunidad introduci dor di Gabinete Wever-Croes I y II, no ta duna ningun muestra di vision of comprension pa e situacion cu ta empeorando pa e gran cantidad di e comunidad aki.
Sector comercial tampoco ta mira ningun perspectiva. Estudionan haci dor di Banco Central Aruba ta afirma esaki cada biaha di nobo. E maneho hiba no a duna ningun resultado positivo riba ningun tereno.
“Aruba no por sigui sufri y perde tempo cu un maneho cu no ta ofrece perspectivanan positivo. E cambio mester bin. Cosnan mester bay di otro forma. E por bay di otro forma tambe.” Esaki tabata e palabranan cu lider di fraccion di AVP mr. Mike Eman a usa na momento di a anuncia e presupuesto alternativo di fraccion di AVP pa 2022.
Apesar di tur e señalnan obvio cu ta bin di tur rango social-economico y publico di Aruba, Gabinete Wever-Croes II ta indica cu pronto ta bay bin hopi mas medida desastroso .
Situacionnan social-economico serio no ta bay wordo resolvi. Presupuesto 2022 di Gabinete Wever-Croes ta muestra di esaki. Menasa di recorte grave den calidad y accesibilidad pa loke ta cuido medico, limitacion di acceso na enseñansa, recorte den entrada di empleadonan di sector (semi) publico y enseñansa, no ta wordo soluciona.
Gabinete Wever-Croes ta nenga den forma pertinente pa carga su responsabilidad constitucional y social pa bin cu solucionnan pa e problemanan serio aki. Pero si e ta sigui hisa gastonan di gobierno cu no ta sirbi ningun otro meta cu fortalece su propio posicion politico y interes.
Empobrecemento di e comunidad y e deterioro di partinan di e isla no ta hayando atencion. Iniciativanan pa stimula e economia no ta wordo tuma. E presupuesto alternativa di AVP hustamente kier adresa e problemanan serio aki, asina Eman a bisa.
E desaroyonan cu tin awor mester stop. Nan no por ni mag di sigui. Aruba definitivamente merece miho! E tendencia negativo den cual Aruba ta den actualmente mester wordo cambia den mehoracion economico, reconstruccion social y perspectiva di un mehoracion pa tur hende.
Partido di Pueblo Aruba AVP ta convenci di esaki y ta ofrece Staten awe como ehempel di esaki un presupuesto alternativa pa aña 2022. Den e presupuesto aki AVP ta propone cuatro cambio cu lo percura cu medidanan anuncia of ya tuma caba por wordo elimina.
E cuatro cambionan aki ta:
elimina e recorte di 12.6%;
elimina e medidanan cu por trece cuido medico den peliger pa esnan di menos recurso;
evita e aumento drastico di schoolgeld pa e scolnan di SKOA dor di soluciona e problema di werksternan conforme e proposicionnan di e landsbemiddelaar;
introduccion di un bijstand pa famianan cu yiunan cu necesidadnan special.
Cubrimento financiero di e cuatro proposicionnan aki ta bin di e presupuesto mes. Tur e proposicionnan aki ta budgettair neutral. Esaki ta posibel dor di haci cambio den e destinacion di e placanan den e begroting, dor di baha e gastonan di gobierno pa asina por mantene e poder di compra di e poblacion.
Segun Raad van Advies e post “goederen en diensten” di gobierno a subi den forma barbaro. Fraccion di AVP ta sostene e preocupacion aki y kier pone prioridad cu 27.5% di goederen en diensten por cubri e solucionnan propone pa fortifica e poder di compra, soluciona e problema di e werksternan di SKOA y introduci un gehandecaptenuitkering pa famianan cu yiunan special. E ultimo aki ta basa riba un proposicion di iniciativa di Eman y Wyatt-Ras. Cosnan mester cambia y por cambia! Fraccion di AVP ta mustra esaki cu e cambionan aki, cu e cambio di curso tambe por bou di e situacionan actual. Cosnan mester ta otro y mester por otro!!