Konseho Sosial Ekonómiko (SER) awe a hisa e bandera kolorido di e Ophetivonan di Desaroyo Sostenibel (Sustainable Development Goals, SDG’s). Ku e akshon di bandera aki, e órgano konsultivo permanente di impresarionan, sindikatonan i ekspertonan independiente, ta mustra su kompromiso ku un prosperidat amplio pa un i tur. E SDGs’-nan ta un kompas pa por alkansá e meta aki. Kòrsou tambe a komprometé su mes na e ophetivonan di desaroyo sostenibel ku enfoke spesial riba SDG 1 Nò na pobresa, SDG 3 Salú bon i bienestar, SDG 4 Edukashon di kalidat, SDG 7 Energia limpi i aksesibel, SDG 8 Trabou digno i kresementu ekonómiko i SDG 14 Bida bou di awa.
Ku regularidat SER ta wòrdu aserká pa duna konseho riba temanan ku ta relatá na e ophetivonan di desaroyo sostenibel menshoná. Aspektonan general relatá na prosperidat amplio i e SDG’s-nan hopi biaha ta sentral den konsehonan ku SER ta emití.
