Riba enkargo di ministerio di Asuntunan Interno i Relashonnan den Reino (BZK) na na Boneiro e momentunan akí Glenn Thodé (èks gezaghebber di Boneiru) i Jacques van Eck (èks miembro di Konseho di Raad van State) ta eksplorá si por introdusí legislashon kontra deskriminashon pa Boneiru, Saba i Sint Eustatius.
Motibu pa esaki ta e petishon di e gezaghebbernan di e islanan pa introdusí i implementá e legislashon akí rápido. Pa esaki nan a skirbi un karta na Sekretario di Estado di Relashonnan den Reino i Digitalisashon, Alexandra van Huffelen.
E eksplorashon tin komo meta pa investigá si introdukshon di legislashon kontra deskriminashon ta faktibel i kiko e konsekuensianan lo ta. Ta bai pa introdukshon di legislashon, pero tambe pa wak kon pa regla ku personanan por denunsiá deskriminashon i risibí ayudo.
Por pensa riba dunadónan di trabou ku ta kita un trahadó temporalmente pa motibu di embaraso, un doño di restorant ku no ta duna un kliente desabilitá trato rasonabel, un skol ku ta nenga un alumno òf dosente pa motibu di orientashon seksual òf trahadónan ku no ta risibí pago igual pa e mesun trabou.
Pa por implementá e eksplorashon korektamente, Glenn Thodé i kolaboradónan di BZK Suzanne Vogel i Barbera Veltkamp lo bishitá tur e tres islanan di 2 te 13 di novèmber. Nan tin sita ku diferente organisashon (sosial), representante di hóben- i personanan desabilitá, komunidat di LHBTQ+, dunadónan di trabou i e entidatnan públiko. Despues di e bishita di trabou lo informá Tweede Kamer tokante e resultadonan di e eksplorashon.