Dia 15 di òktober último den Corallium Hotel a presentá e Intenshon di Klima Boneiru na habitantenan i interesadonan. E presentashon tabata na enkargo di sr Oleana, presidente, i sr Alders, miembro di e grupo di proyekto Mesa di Klima Boneiru. E intenshon akí, den kua a inkluí ocho ambishon sentral di klima, ta marka un logro importante den e proseso na kaminda pa un Boneiru resiliente pa klima i sostenibel.
E ambishonnan di klima ta sirbi komo un kuadro di duna direkshon pa tur hende na nos isla – for di siudadanonan i empresanan te organisashonnan sosial i gobièrnunan. Nan ta ilustrá kiko ta nesesario pa mantené nos isla habitabel den un klima ku ta kambiando.
Realisashon di e Intenshon di Klima ta algu spesial:
E ta un proseso realmente ‘bottom up’, alimentá pa konosementu i preokupashon di nos komunidat boneriano. Entre luna di mart i luna di sèptèmber 2025 desénas di kòmbersashon di mesa di klima a tuma lugá, ku kontribushon di entre otro habitantenan for di diferente bario, studiantenan, empleadonan públiko, piskadónan i empresarionan.
Ocho Ambishon di Klima pa Boneiru
E Intenshon di Klima ta menshoná ocho ambishon ku ta duna direkshon na adaptashon na klima i mitigashon di klima na nos isla. A ordená esakinan segun tres nivel: kondishonnan básiko, temanan konkreto i e resultado deseá.
Kondishonnan básiko: kolaborashon i konosementu
Kolaborashon – Fortifiká kolaborashon entre siudadanonan, organisashonnan, empresanan i gobièrnunan, ku atenshon pa sosten i diferensianan sosial ekonómiko.
Konosementu – Oumentá konosementu i konsientisashon tokante kambio di klima i kon tur hende por kontribuí na un isla habitabel, tambe a base di konosementu tradishonal.
Temanan di aktuashon
Awa – Anda na un manera inteligente ku awa: kolekshon, reuso, i protekshon di kalidat di awa.
Siguridat di kuminda – Fortifiká produkshon lokal di kuminda i stimulá inovashon i inisiativanan riba eskala chikitu.
Maneho di naturalesa – Restorashon i protekshon di áreanan di naturalesa, vegetashon i ref di koral.
Patrimonio kultural – Protehá patrimonio tantu tangibel komo intangibel kontra efekto di klima.
Siguridat di energia – Sòru pa energia konfiabel, pagabel i sostenibel pa tur habitante.
Resultado
Bienestar – Mehorashon di bienestar general di nos poblashon, pa medio di protekshon di salú, siguridat, siguridat di eksistensia i ekonomia turístiko. Pensa riba limitashon di strès di kalor, daño debí na wer ekstremo i plamamentu di malesa manera dengue.
Nolly Oleana, presidente di Mesa di Klima Boneiru, a ekspresá su apresio durante e enkuentro:
‘Mi ke gradisí tur hende pa nan kontribushonnan balioso na e proseso akí. Boso enbolbimentu ta krusial. E Intenshon di Klima ta di i pa Boneiru. Huntu nos ta edifiká un base fuerte pa e maneho di klima di futuro.’
Durante e enkuentro, e presentenan a sostené e intenshon di klima pa medio di firma esaki na e sitio ei mes. Pa esunnan ku no por tabata presente, e posibilidat ta keda eksistí pa firma e intenshon di klima online. Parti abou di e informe akí e lenk pa firma online ta disponibel.
E intenshon ta forma un paso intermedio importante den direkshon di e Plan di Klima Boneiru, ku na aña 2026 ta keda presentá na Entidat Públiko Boneiru. E plan akí lo duna elaborashon mas aleu na e ambishonnan i nan kontinuashon. Diputado Clark Abraham a sera e enkuentro i den su palabra final el a aksentuá kon importante e ehekushon ta, ku ta sigui despues di entrega di e Plan di Klima den e promé kuartal di aña 2026.
E Intenshon di Klima i e posibilidat pa firma esaki online, ta disponibel via:
https://forms.gle/KTEkFmAETGXtgu6cA
Pa mas informashon òf entrevista, bo por tuma kontakto ku:
Ivy Adriaens Lo Tam Soen – info@klimaattafel-bonaire.com
Nos Isla, Nos Responsabilidat!