Recientemente, y den un encuentro social yena di emocion y orguyo cultural, Impact Hub Aruba a sirbi como escenario pa e lansamento oficial di E Bahul di Clyde, e obra literario mas reciente di columnista, educador y historiador amateur Clyde Harms Jr..
Compaña pa un publico distingui, e evento a celebra un publicacion cu ta compila mas cu 100 articulo cu
Harms a skirbi durante 40 aña pa corantnan di Aruba, captando historia, cultura, anecdota y relato emblematico di nos isla.
Harms a honra su amigo y colaborador di hopi aña, Alberto Perret-Gentil, como padrino di e buki. “Clyde a siña mi kico ta responsabilidad social, y mi ta wak’e como mi mentor Arubiano… Su dedicacion pa sirbi ta sin limite.”
E portada di e buki ta diseña cu masha amor y talento pa Irene Peterson, mientras cu e correccion linguistico a tuma forma danki na Yorleny Oduber. E prologo, yena di profundidad emocional, ta skirbi pa otro gran amigo di Harms, e tambe autor local, Benjamin Romero.
Entre e distincionnan di su trayectoria literario largo, Harms a publica obra conoci manera Historia di Baseball di Aruba, Storianan di un Mucha di Lagoen, y Un Arubiano na Libia, entre otro titulo cu ta establece su voz unico den literatura Arubiano.
E publicacion ta dedica na Lilian Prince, pa honra su hopi aña di trabou humanitario y su ehempel como ciudadono. Su entrega como director di e Koningin Wilhelmina Fonds y su debocion pa bienestar di Aruba ta reconoci cu e distincion di Ridder in de Orde van Oranje Nassau.
Presente na e ceremonia tabata Prome Minister Mike Eman y su señora Doina, Señora Milagro Harms, casa di Clyde, Alberto Perret-Gentil, Señora Joyce Pereira di Fundacion Lanta Papiamento y hopi invitado cu a bin pa celebra e autor y su legado cultural.
E Bahul di Clyde ta disponibel pa cumpra, y mescos cu su bukinan anterior, Clyde Harms ta duna tur ganashi di benta na Koningin Wilhelmina Kankerfonds, reafirmando su compromiso incansabel na servicio di comunidad Arubiano. E ta un excelente pieza di coleccion y regalo pa e dianan di fiesta.
