Diahuebs anochi den un esfera ameno a tuma luga introduccion di un proyecto nobo pa deporte di baseball “Proline Winter Baseball League”. Durante e “Drafting Night” e cuater ekiponan, manager y “coaching staff” a keda conoci. Ekiponan di Panthers, Tigers, Lions y Jaguars lo midi forsa contra di otro pa seis siman largo pa conkista e titulo di campeon, di e prome edicion di Proline Winter League. E campeonato di baseball lo bira uno di aproximadamente 40 wega di hungadonan den e edad di 18 aña pariba hungando den baseball na e.o. Aruba, Curaçao, Italia, Hulanda, Czechoslovakia y Merca. Durante e ceremonia Mandatario di Deporte a hiba palabra y a expresa cu momento cu sr. Kevin James a presente e proyecto e por a conta cu e sosten di Ministerio di Deporte. Manager y “coaching staff” ta duna oportunidad nan nos atletanan local como tambe nos atletanan firma cu por bin hunga y brinda asina oportunidad desaroya e deporte di baseball riba otro nivel na Aruba. E ta sigur un bunita iniciativa. Palabranan di pabien na comision organisado y sr. Kevin James cu ta e motor tras di e proyecto aki. E campeonato ta dedica na nos astro pelotero den Mayor League Baseball, Xander Bogaerts. Su kerida Mama, sra. Sandra Brown a representa Xander e anochi aki. Concluyendo Minister Endy Croes ta enfatisa; ban apoya nos hobennan y ban apoya baseball. Deporte ta e vehiculo cu ta trece nos hunto, deporte ta e vehiculo pa trece union den comunidad. Masha pabien oragnisadonan y hopi exito!
