Aruba tabata dignamente representa na Sint Eustatius (Statia) pa participa den e celebracion historico di 250 aña di The First Salute y 22 aña di reconocemento oficial di e himno y escudo di e isla. E delegacion oficial di Aruba tabata encabesa pa Prome Minister di Aruba, sr. Mike Eman, hunto cu Minister Gerlien Croes.
E celebracion special aki a conta cu presencia di Su Mahestad Rey Willem-Alexander, como tambe diferente dignatario y representante di Reino Hulandes y Merca, kende a reuni pa conmemora un momento historico di gran importancia pa Sint Eustatius y su pueblo.
E acontecimento di The First Salute ta referi na e saludo historico cu Sint Eustatius a brinda dia 16 di november 1776 na e barco Mericano Andrew Doria, marcando e prome reconocemento internacional simbolico di e bandera di Merca durante su lucha pa independencia. Awe, 250 aña despues, e acontecimento aki ta sigui representa un simbolo importante di e lasonan historico entre Sint Eustatius y Merca.
Pa Aruba, e participacion na e celebracion aki ta representa no solamente un momento di conmemoracion historico, sino tambe un oportunidad pa enfatisa e importancia di identidad cultural, amistad y cooperacion entre e islanan di Caribe Hulandes y e paisnan den Reino.
Ta cu hopi honor y placer cu Aruba ta participa den e celebracion historico aki, hunto cu pueblo di Sint Eustatius. E 250 aña di The First Salute ta recorda nos di e importancia di nos historia comparti, mientras cu e celebracion di himno y escudo ta reafirma e orguyo y identidad propio di e pueblo di Statia. Momentonan manera esaki ta fortalece e lasonan di amistad, respet y union entre nos islanan y den Reino, Segun Minister Gerlien Croes
E presencia di e delegacion di Aruba na Statia Day ta un expresion claro di e bon relacionnan y e compromiso continuo di nos pais pa fortalece e cooperacion y fraternidad cu Sint Eustatius y e otro islanan den Reino Hulandes.
Gobierno y pueblo di Aruba ta extende nan felicitacion cordial na pueblo di Sint Eustatius (Statia) na ocasion di e celebracion historico aki, deseando e isla y su comunidad un futuro yen di progreso, prosperidad y union.
Happy Statia Day! Feliz Dia di Statia!
