Den último simannan tin hopi diskushon den komunidat tokante eskoho di sekso di kada ken. Esaki ta un diskushon pisá i tin biaha nos ta mira ku gruponan ta falta rèspèt pa otro.
Den un komunidat nos por diferensiá di opinion, nos por ta mira kos diferente di otro persona pero finalmente nos tur ta yu di Dios.
Dios a drama su amor riba nos i a yama nos kada un pa stima nos próhimo manera nos ta stima nos mes ounke e por ta di otro rasa, sekso, partido polítiko o religion.
Nos no mester laga rasa, sekso, religion, orientashon di sekso ni nada otro dividí nos komunidat. Nos kada un tin un ròl den e komunidat akí pa krea algu ku e próksimo generashon por gosa i ta orguyoso di dje.
Komo partido, MPB tin komo un di e prinsipionan básiko den bida amor i rèspèt pa tur hende. Un otro prinsipio básiko di nos partido ta derecho igual. P’esei nos ta hasi un yamada na nos komunidat pa kada ken respetá otro, su patrimonio, su rasa pero tambe su orientashon seksual. Laga nos ta un komunidat inklusivo kaminda tur hende ta sinti nan parti di e komunidat akí. Finalmente nos tur ke ta felis i niun di nos no por skohe felisidat pa otro!