Otro siman di 24 pa 29 si juni, e federacion di landamento na Aruba lo host e competencia international, UANA Pan American Artistic Swimming 2021, na Pisina Olimpico y cu lo conta cu un participacion di mas cu 110 atleta for di exterior. Mirando cu magnitud di e competencia aki, e atletanan lo ta compitiendo den oranan cu ta basta calor. Pa facilita e diferente delegacion awa durante e competencia, Aruba Aquatics Federation a aserca EPB-San Nicolas nan sector tecnico pa asina nan bin instala 3 di nan recien innova YAKU Waterdispenser alternativo pa asina tur e landadonan por bebe awa na un manera hygienico y safe.
Mester bisa cu e diseño aki ta e di tres cu EPB San Nicolas ta diseña. Docentenan Errien Croes y Jeremy Boekhoudt a sinta y rediseña e ‘Solver’ full di nobo. A test esaki diferente biaha y asina a keda adapta e diseño te ora a logra un cu ta mas confiabel. A keda busca diferente nomber na diferente lenguahe cu ta significa awa y a bin haña e nomber nobo cu ta YAKU.
E waterdispenser alternativo YAKU ta conforme tur e reglanan di seguridad. Debi na e pandemia Covid_19, e uso di “watercooler” na scol a bira dificil y a ser prohibi. Aki Unidad Tecnico di EPB San Nicolas a pone man na obra pa asina tog nos alumnonan por haci uso di e watercooler nan pero den un forma hopi mas higienico y safe.
E prome dos waterdispenser nan a traha cu censors pa den e forma aki tog e alumnonan por bebe awa! A traha un prototipo di metal pero despues a hasi diferente test y cu un 3d printer a logra traha un di dos prototipo, tur dos hopi safe y conforme regla. E ultimo version ta e recien innova YAKU waterdispenser alternativo cu ta traha diferente. E modelo aki no tin sensor manera e dos prome prototipo nan door e solo ta keda blind e sensor y duna problema. Pa e motibo aki a traha un switch pa e modelo YAKU, manera e haña e peso di boter e ta basha e awa y ora kita e boter, e awa ta stop di basha! Ta bon pa bisa aserca cu na e YAKU waterdispenser alternativo no ta pone boca pa bebe awa pero ta yena beker of boter.
Anja pasa na habrimento di e aña escolar, Su Excelencia Gobernador di Aruba, Sr. Alfonso Boekhoudt a bishita EPB San Nicolas y a haya un splicacion di e alumnonan di sector tecnico encarga riba e funcionamento di e waterdispenser alternativo. Nos EPB San Nicolas kier a gradici Aruba Aquatics Federation pa e confiansa deposita den nos scol y alumnonan pa instala e tres YAKU waterdispenser alternativo na Pisina Olimpico Roly Bisslik.
Riba e combinacion di foto por mira alumnonan cu a yuda instala e YAKU waterdispenser alternativo, Jaydrick Geerman y Brandon Brouwer di sector tecnico 3 de jaars hunto cu docente Jeremy Boekhoudt y representante nan di AAF, Sra. Charissa Kock-Croes y Sra Natasha de Veer – Lopez.