Un grupo di studiante di De Haagse Hogeschool (HSS) a hasi un bishita awe na Konseho Sosial Ekónomiko (SER), den kuadro di nan minor ‘Relashonnan den Reino’. Durante e bishita, nan a risibí informashon detayá kon e órgano di konseho i konsulta aki ta asesorá Gobièrnu i Parlamento den formulashon di desishonnan den ámbito sosioekónomiko.
Funshonarionan di SER a duna un splikashon detayá di e base legal di e órgano, kon ta formulá i revisá konsehonan, i ki papel SER tin den e kuadro konstitushonal di Kòrsou. E bishita a duna e studiantenan oportunidat úniko pa mira mas di aserka kon maneho públiko i e proseso leglislativo ta tuma lugá riba un isla chikí manera Kòrsou.
Interes di HSS den SER di Kòrsou ta sigui krese. Bastante studiante di De Haagse Hogeschool a yega di kore stazje na SER, un kolaborashon ku — sigun fuentenan ku konosé e kuríkulo — ta yuda fortifiká komprenshon entre e partinan karibense i oropeo di Reino Hulandes.
