E siklo: “Kòrsou bas den su mes kas” organisá pa Akademia Popular Errol Scoop, e
ala di formashon emansipatorio di Movementu Kousa Promé, a kontinuá dia 22 di
aprel ku hurista fiskal Edsel Payá Rosenda. Dosente Rosenda a splika na plaka
chikí kon korupshon ta mata desaroyo di país Kòrsou. Pa Kòrsou bira bas den su
mes kas e mester eradiká e malesa króniko ku yama korupshon. Kòrsou por, basta
krea sistemanan efektivo pa bringa e kanser ku yama korupshon.
Dia 29 di aprel mr. Denicio Brison hurista i abogado radiká na Sint Maarten a
splika i proba detayadamente ku país Sint Maarten igual ku Kòrsou ta kolonia di
Hulanda. El a splika kon gobernadó ta hasi e trabou di dominio i kòntròl pa pais
kolonisadó Hulanda. El a ilustrá pa medio di Koninklijk Besluit kon gobièrnu
hulandes ta intervení den asuntunan interno di Kòrsou i Sint Maarten. El a duna
ehèmpel kon Hulanda a i ta uza Statüt pa destruí desishonnan legítimo di
gobièrnu di Sint Maarten i di Kòrsou. Desishonnan ku ta na fabor di e islanan pero
ku Hulanda ta haña ku ta kontra su interes polítiko i komersial. Di e manera aki
Kòrsou i Sint Maarten ta den e di sinku siglo di kolonialismo hulandes.
