Un delegacion di Parlamento di Aruba, hunto cu minister di Husticia Arthur Dowers, a bishita Aruba Wastewater Sustainable Solutions (AWSS) pa ricibi informacion riba e progreso di e proyecto di incineracion di desperdicio medico. Segun Managing Director/Technical Director di Utilities Aruba NV, Joseph Everon, e bishita tabata enfoca riba e operacionnan, e contratistanan y e companianan involucra den e proyecto.
Everon a informa cu despues di mas cu seis luna di investigacion y planificacion, AWSS ta den fase di ehecucion di fase uno di e proyecto. Un di e prioridadnan principal ta e procesamiento di cerca di 60 container cu desperdicio medico cu ta stanca for di mas cu dos aña na Aruba.
Como parti di e prome fase, AWSS lo instala incinerator fijo na Parkietenbos, asina tambe incineratornan mobil pa aumenta capacidad y reduci e atraso existente. E incineratornan ta di dos chamber, diseña pa reduci gas nocivo, bacteria y virusnan, y ta ekipa cu controlnan pa cumpli cu normanan ambiental.
E proyecto tambe ta inclui mehora di facilidadnan pa empleadonan, manera vestuario, bañonan, sistema pa laba paña di trabou y un cantina. Fase dos lo concentra riba infrastructura y logistica di transporte di desperdicio medico, cu un sistema automatico pa aumenta siguridad.
Segun planificacion, e incineratornan lo drenta na operacion na luna di maart, mientras cu entrenamiento di personal lo cuminsa pa garantisa maneho sigur di desperdicio medico y general na Aruba.
AWSS ta cuminsa fase uno cu instalacion di incinerator nobo
