Minister di Vivienda Publico, Planificacion Teritorial, Medio Ambiente y Infrastructura (VROMI), Patrice Gumbs, a presenta den Corte di Prome Instancia pa representa VROMI den e caso entre Sunresorts Ltd. N.V. y Gobierno di Sint Maarten. E disputa ta trata e status legal y propiedad di e beach na Mullet Bay.
E punto central di e conflicto ta si Sunresorts, como doño di e terenonan adhacent na e area di Mullet Bay, por reclama propiedad priva riba (partinan di) e beach y e zona costero. Sunresorts a pidi Corte pa declara cu nan ta e doño legal di e tereno cu ta extende te na e liña di costa, y cu Gobierno a actua di un forma ilegal dor di emiti permisonan y permiti tercernan opera negoshi riba e beach. Sunresorts ta busca tambe un orden di corte pa prohibi Gobierno di sigi cu e actividadnan aki y a pidi pa impone multanan financiero halto den caso di incumplimento.
Gobierno di Sint Maarten a rechasa e reclamonan aki categoricamente. E posicion di Gobierno ta cu e beachnan di Sint Maarten, incluyendo Mullet Bay, ta forma parti di e dominio publico y ta pertenece na e pueblo. E posicion aki ta basa riba principionan legal di tempo bieu y provisionnan den ley, cu ta stipula cu beachnan ta propiedad di e Pais, a menos cu proba lo contrario di un forma irefutabel. Durante e procedura, Gobierno a argumenta cu Sunresorts no a presenta ningun titulo legal valido cu ta demostra propiedad di e beach mes. Gobierno a enfatisa cu e actanan historico y documentonan di Kadaster cu Sunresorts ta uza, ta referi na tereno banda di lama, pero no ta establece propiedad di e beach.
Ademas, Gobierno a resalta cu historicamente e beachnan a keda publicamente accesibel y a wordo maneha como tal. “Nos no por laga un solo documento establece un precedente cu lo horta e beach mas popular for di nos pueblo y permiti otronan trata di reclama nos costanan,” Minister Gumbs a declara.
E caso aki ta lanta cuestionnan fundamental tocante acceso publico na beachnan, e alcanse di derechonan di propiedad priva y proteccion di e herencia costero di Sint Maarten. Corte a indica cu e sentencia den e asunto aki lo wordo dicta dia 9 di juni 2026. Minister Gumbs a finalisa bisando: “Nos beachnan ta pertenece na e pueblo y semper lo keda asina.”