E siman aki, den marco di e Siman Internacional di Conscientisacion di Trastorno Frontotemporal (World FTD Awareness Week 2026), e famia di e famoso actor di cine Bruce Willis a comparti detayenan nobo y positivo tocante su bida diario cu e condicion aki di FTD (Fronto Temporal Disorder / Trastorno Fronto Temporal). Pa coincidencia, diaranson 30 di september 2026, Aruba lo tin un charla educativo masha importante unda comunidad por siña structuralmente tocante e trastorno neglisha aki cu ta ataca cerebro di esnan den edadnan hoben (45-65 aña). Famia di Bruce Willis ta comparti un relato positivo riba su salud actual. Bruce Willis a wordo diagnostica cu FTD na aña 2023 y e ta reconoce su famia cla cla ainda.
Su casa, Emma Heming Willis, a declara recientemente den un entrevista cu Bruce ta keda un persona “masha presente” den bida di su famia. Emma a splica cu tin un percepcion falso cu tur Trastorno Neurocognitivo (antes yama Demencia) ta afecta memoria mesora manera ta e caso cerca malesa di Alzheimer. Den caso di FTD, e malesa ta afecta principalmente e partinan di cerebro cu ta maneha conducta, lenguahe y movecion. El a confirma cu Bruce ainda ta reconoce y corda su famia perfectamente, y cu nan ta sigui disfruta hunto di hopi “momento bunita di alegria y conexion”. E luna aki mes, Bruce a haci un aparicion publico masha special y alegre na boda di su yiu muhe Tallulah manera por wak riba e potret ariba.
Diaranson anochi lo pasa riba e condicionnan aki di FTD durante un Charla Informativo na Biblioteca Nacion na San Nicolas.
P’asina educa nos pueblo riba e topico aki cu ta afectando hogarnan di un of otro forma na Aruba y na edad hoben. Despues di malesa di Alzheimer, mundialmente, FTD ta e condicion neurodegenerativo mas frekwente.
E titulo di e charla educativo aki, ta: “Descubriendo e Misterionan di Trastornonan Frontotemporal”.
E detayenan di e evento ta:
Fecha: Diaranson, 30 di september 2026
• Ora: 7:00 PM – 9:00 PM
• Sitio: Biblioteca Nacional San Nicolas
• Entrada: Totalmente Gratis y ta habri pa publico general
E oradornan specialisa pa e anochi aki ta Dr. Jayburtt Dijkhoff (PDA) di Pashentnan di Aruba, y Drs. Melva Croes-Yánez (F.A.A.) representando Fundacion Alzheimer Aruba. Durante e charla aki, e expertonan aki lo splica con pa reconoce e sintomanan, con e malesa ta progresa, con e famia y cuidadornan por duna e miho sosten structural na nan ser keri y conoce derecho di pashentnan y nan cuidadornan cu tin di haber cu, entre otro, un condicionan asina.
Comunidad di Aruba, specialmente esnan cu tin famia of conoci cu ta experiencia retonan caminda bida ta wordo afecta pa, entre otro, e grupo di condicionan neurodegenerativo aki di FTD, ta keda cordialmente invita pa asisti y educa su mes.
Nos ta topa diaranson anochi na Biblioteca Nacional na San Nicolas.
Pa informacion por comunica cu 5928416 via WhatsApp.