Durante e recien congreso di Partido di Pueblo Arubano (AVP), un di e figuranan clave di e partido, Arthur Dowers, a reflexiona riba e trayectorio historico di e organisacion politico, e transicion generacional en marcha, y e retonan global cu e lidernan di futuro mester enfrenta.
Un Fundeshi Solido di Principio y Experiencia
Recordando e momento historico cu e conoci jingle “Ban cas Back” a resona, Dowers a tuma un momento pa rindi homenahe na e lidernan historico di AVP, entre nan Henny Eman, Watty Vos, Arends, Christians, Tico Croes, Margarita y Mito Croes.
Dowers a resalta cu e lidernan aki a percura pa pone un fundeshi solido pa e partido, basa riba e conviccion profundo cu politica mester sirbi e interes general di e pais y no e interesnan personal di un grupo reduci.
Reflexionando riba e discursonan inspirativo di e congreso, Dowers a expresa su confianza den e paso di batuta pa e generacion nobo. Segun e politico, AVP ta contene na e momento aki un combinacion ideal: e energia di un grupo hoben cu ta join e fila, hunto cu e guia di personanan cu un trayectorio largo .
“Mi sa cu hende hoben ta atrae hende hoben, y mi sa tambe cu experiencia y e determinacion di e lidernan grandi ta inspira hendenan nobo. AVP tin un combinacion ideal pa contribui un bes mas pa haci cosnan grandi pa Aruba,” Dowers a enfatisa.
Den su presentacion, Dowers a haci un yamada pa wak mas leu cu e frontera teritorial di Aruba. E retonan actual den mundo ta exigi cu e lidernan di futuro no solamente ta dedica atencion na e desaroyo di e pais, sino cu nan mester asumi e responsabilidad di protege e planeta. Un reto cu, segun e, ta mas grandi y mas compleho cu esnan di pasado, pero di cual e compromiso mester keda firme.
Na momento cu e periodista a puntr’e tocante su futuro politico y si e lo sigui cu e siguiente generacionnan, Dowers a aclaria cu e ta keda semper na disposicion di e pais y di e partido.
Dowers a subraya cu for di su dianan como studiante e tabata dedica na politica, pero nunca cu e intencion di forsa un posicion of busca beneficio personal. “Ami semper ta tey pa sirbi. Semper na momento cu mi tin energia y ora mi wordo yama pa sigui sirbi, lo mi haci esey,” el a conclui.