Sindicatonan ta cuestiona legitimidad di HOFA “Nos mester tuma e rienda den nos man”.Den un reunion crucial cu a reuni e sindicatonan mas grandi di Aruba, Jaybertt Dijkhoff a pone e atencion riba e situacion huridico y financiero di nos pais, enfatisando e rechasamento di e Rijkswet financieel toezicht (HOFA). E structura actual ta wordo considera inconstitucional y un menasa pa autonomia di Aruba.
Durante e encuentro aki, Dijkhoff a enfatisa cu e meta principal tabata pa analisa e hechonan rond di e trayecto di HOFA, kitando e “framing” politico cu hopi biaha ta distorsiona e debate publico. “Nos a bin papia over di e hechonan. Pasobra nos tur tin derecho di forma un opinion, pero nos no tin derecho pa manipula e hechonan,” el a declara.
Argumento contra HOFA
Un di e puntonan central di e discusion tabata e efectividad di e medidanan actual. Segun Dijkhoff, gobierno a logra baha e debe nacional cu 5% den un solo aña. “Si sigui baha asina pa 2028, nos ta baha bou di e norma di IMF sin HOFA. Ta cuestionabel e ora pakico HOFA mes mester bin.
Ademas, a wordo treci dilanti cu e College financieel toezicht (Cft) tin preocupacion riba e capacidad di ehecucion di gobierno, aunke tin placa disponibel pa inversion. Pa e sindicatonan, e solucion no ta den supervision externo cu ta forsa un consenso, sino den un desaroyo organico. “Wak Boneiro, wak Corsou, nan tambe tin e RAft. Nan a bay padilanti? No,” Dijkhoff a argumenta, referiendo na e falta di progreso den otro islanan di Reino cu ta bao di medidanan similar.
Falta di transparencia gubernamental
Dijkhoff a critica duramente e falta di transparencia di e gobierno actual. Segun e, gobierno ta negociando cu Hulanda y sugeriendo cu tin “consenso,” mientras cu ni parlamento ni pueblo a wordo bon informa. El a subraya cu un pais “eks-colonisado” no por wordo imponi cu un poder cu no tin base den un eleccion of referendum, ni consenso real di pueblo.
E sindicatonan, kende ta hunga un rol fundamental den e democracia di Aruba, a wordo urgi pa asumi nan responsabilidad como lidernan di nan achterban. E mensahe final tabata uno di empoderamento: Aruba tin e capacidad pa dirigi su mes, mescos cu el a bin ta haci desde 1986.
E porta no a cera ainda,” Dijkhoff a conclui. “Tanten cu nos kier, tene nos mes, cu nos tin capacidad den nos mes, nunca ta laat.” E esfuerso awor ta pa filtra e informacion aki pa tur miembro di sindicato y comunidad en general, pa asina e pueblo por forma un opinion basa riba factornan y no riba agenda politico.
