Minister di Cultura Xiomara Maduro: Dia di Betico
Dia 25 di januari, e fecha natalicio di Betico Croes, riba e plaza cu ta carga su nomber, nos dignatarionan a bini hunto pa forma parti di e Acto Protocolar na honor di nos Libertador G.F. Betico Croes. Despues cu nos dignatario y invitadonan a wordo ricibi pa e comision di recepcion, Minister di Cultura a ricibi su Excelencia Gobernador di Aruba Sr. Alfonso Boekhoudt y su distinguido esposa.
Despues cu e Maestro di Ceremonia Jenniree Dirksz a ricibi permiso di Su excelencia Gobernador, e programa di Acto Protocolar a inicia cu Himno di Aruba, “Aruba Dushi Tera” interpreta pa e hoben Jorienne Angela. Maestro di Ceremonia Jenniree Dirksz A sigui cu un oracion y bendicion di parti Reverendo Pastor Toti F. Fuentebella. Minister President Wever-Croes a hiba un discurso pa recorda e gran estadista Arubano y su legado pa Aruba, e trayectorio impresionante di Betico Croes, e stimacion pa su isla natal cu tabata asina grandi y esaki tabata visibel atrabes di su lucha y sacrificio cu ela hiba pa logra e deseo di e pueblo Arubano.
E programa a sigui cu canto, poema y baile door di hobennan cu a duna un bunita presentacion na honor di Betico:
E hoben J-Vyon Besselink a declama un poesia “Ta E ta Betico”, cual ta skirbi pa Tio George Winterdaal. A continua cu un baile di grupo Mini y Pre-Teen Chaz Dancer bao direccion Chastity Kock- Hodge cu presenta riba e ritmo di e cancion titula “Betico” di Ronny Kock.
Manera ta custumber a luga e acto di ofrenda floral cual a wordo haci pa Parlamento di Aruba, Gobierno di Aruba, Famia Croes, Fundacion Betico Croes y Asociacion di Consulnan na Aruba.
E mainta aki dos cancion nobo a ser estrena na honor di nos Libertador, e prome tin e titulo “Danki na Dje”, cual a wordo canta pa e hoben Lizienne Webb, un composicion di Edseline Figaroa y areglista Rigel Isabella.
E grupo di baile Teen Chaz Dancer bao direccion di Chastitiy Kock-Hodge a presenta un baile riba e ritmo di e cancion ‘Danki na dje’ di Edjean Semeleer.
E hoben Jetzenia Martines a interpreta e otro cancion nobo cu tin e titulo “No tin nada pa kibr’e”, un composición di Edseline Figaroa y areglista Rigel Isabella, y nan a wordo acompaña pa NTG bao direccion di Marisol Penja.
E acto protocolar a termina cu presentacion di Himno di Aruba, “Aruba Dushi Tera” interpreta pa e hoben “Jorienne Angela”. Despues di esaki a anuncia salida di Su Excelencua Gobernador di Aruba Señor Juan Alfonso Boekhoudt y su destinguido esposa.
Minister di Cultura Xiomara Maduro ta gradici tur invitado cu a honra cu nan presencia, muy enparticular e yiunan y nietonan di Betico. E mandatario ta gradici Comision Celebracion Dianan Nacional pa e organisacion y tur artista cu hunto a brinda honor y respet na nos Libertador cu un bunita y digno evento. Danki na un y tur.
