Durante Carnaval 2026, Aruba a presencia algo special riba su cayanan: musica, disciplina y orguyo
cultural den man di nos muchanan. Pa medio di e proyecto Asambeho Kids Aruba, Aruba Tourism
Authority (A.T.A.) a inverti activamente den e futuro di nos cultura, poniendo un di nos tradicionnan
musical di mas gusta na e centro di e celebracion di Carnaval, den colaboracion cu Fundacion Go Cultura.
Bou liderazgo di Stichting Asambeho School Roderich Lopes, nos muchanan y hobennan talentoso a
brinda un presentacion magnifico durante paradanan di carnaval di mucha na Oranjestad y San Nicolas.
Demostrando asina cu Asambeho no ta djis musica:
E ta formacion.
E ta identidad.
E ta pasamento di conocemento for di generacion pa generacion.
Den Oranjestad y San Nicolas, miles di mirones a disfruta di mira con nos muchanan a marcha cu orguyo,
cu enfoke y cu respet pa un tradicion musical cu tin raiz profundo den nos historia. Pa hopi di nan, esaki ta
e prome biaha cu nan ta participa den un evento di e magnitud aki. Un momento cu nan lo keda cune pa
bida.
E hobennan musico aki di Asambeho Kids Aruba no ta siña solamente ritmo y tecnica. E activacion aki ta
bay mas leu cu solamente presentacionnan den carnaval. E ta forma parti di un programa di formacion
structural y impactante cu duracion di un aña den su prome fase. Durante e trayectoria aki cu ya a
cuminsa na september 2025, nan ta siña kende nan ta, di unda nan ta bin, y kico nan ta carga pa futuro.
Esaki ta un activacion cultural structural y continuo cu ta inclui les y tayernan musical semanal, tayernan
historico riba Asambeho y nos herencia musical Arubano y tambe formacion di caracter, disciplina y
orguyo pa medio di cultura. Nos ta formando constructornan di nacion y embahadornan cultural.
Muchanan cu ta cana cu ritmo, confiansa y identida, bao liderazgo di Stichting Asambeho School Roderich
Lopes.
Aruba Tourism Authority ta reconoce cu inversion den cultura local, specialmente den hubentud, ta un
inversion den nos comunidad, nos continuidad cultural y nos imagen como destinacion. E Proyecto
Asambeho Kids ta ehempel bibo cu ora institucion y comunidad traha hunto, nos por crea espacio pa
crecemento, expresion y pertenencia riba e mesun cayanan unda nos cultura a nace. Carnaval 2026 ta
bira asina no solamente un celebracion, pero un declaracion cla di ken nos ta y con nos ta sigui construi
nos futuro.
Nos cultura ta bibo, ta sigui biba, y e futuro ta den man di nos muchanan!
