Outo na kandela
Riba djárason 15 di mei, alrededor di 10.35 or di mainta, 'meldkamer' sentral a risibí notifikashon
tokante un outo na kandela dilanti di un akomodashon turístiko riba Bulevar Gobernador N. Debrot.
Na yegada di e patruya, presentenan a paga e kandela ku un aparato di paga kandela. Brantwer a
bini tòg na e sitio pa kontrolá ku e kandela tabata bon pagá. No tabatin herido. Kousa di e kandela
no ta konosí.
Detenshonnan pa manehá bou di influensia
Den e dianan ku a pasa, a hasi 6 detenshon pa manehá bou di influensia di alkohòl.
Riba djárason 15 di mei, alrededor di 1.50 or di mardugá, a para shofùrnan di dos skuter riba Kaya
Papa Cornes pa un kòntròl rutinario. Despues di un investigashon, a hasi un tèst di supla ku ámbos
shofùr i a resultá ku nan a konsumí mas alkohòl ku ta permití. Pa e motibu aki a detené ámbos pa
manehá bou di influensia di alkohòl i a transportá nan pa warda di polis pa un análisis di rosea. A
konsekuensia di e resultado di esaki a konfiská reibeweis di e dama di inisial F.C.I.W. di 20 aña di
edat i e otro shofùr, un hòmber di inisial J.v.M. tambe di 20 aña di edat a haña un prohibishon pa
manehá di 3 ora.
Riba djadumingu 12 di mei, alrededor di 10.05 or di anochi, a detené un hòmber di inisial J.G.F.V. di
55 aña di edat riba Kaya Amsterdam pa manehá bou di influensia di alkohòl. Un patruya a mira e
sospechoso na momentu ku e tabata stashoná mitar riba asera. Dor ku e parti dilanti di e vehíkulo
tabatin daño, esaki a hala atenshon di e agentenan. E shofùr a deklará ku e ta bon i ku nada no ta
pasando. Despues di un kòntròl mas aleu, e sospechoso tabata mustra diferente karakterístika di un
persona ku ta bou di influensia di alkohòl. A hasi un tèst di supla kuné i a resultá ku el a konsumí mas
alkohòl ku ta permití. A hiba e sospechoso warda di polis pa un análisis di rosea i a konsekuensia di e
resultado di esaki, a konfiská su reibeweis.
Riba djadumingu 12 di mei, alrededor di 7.10 or di mainta, 'meldkamer' sentral a risibí notifikashon
ku un outo a dal den kurá di un kas na Kaya Papa Cornes i ku e shofùr probablemente ta bou di
influensia di alkohòl. Na yegada di e patruya, e shofùr tabata mustra diferente karakterístika di un
persona bou di influensia di alkohòl i a hasi un tèst di supla kuné. Aki a resultá ku el a konsumí mas
alkohòl ku ta permití. A detené e sospechoso, un dama di inisial Z.R.S. di 46 aña di edat i a hib
warda di polis pa un análisis di rosea. A konsekuensia di e resultado di esaki, a konfiská su reibeweis.
Riba djadumingu 12 di mei, alrededor di 2.20 or di mardugá, un patruya a mira un pikòp riba Bulevar
J.A. Abraham. E shofùr tabata mustra un komportashon di manehá sospechoso i a dun'é òrdu pa
para. Despues di un kòntròl mas aleu, e sospechoso tabata mustra diferente karakterístika di un
persona ku ta bou di influensia di alkohòl. A hasi un tèst di supla kuné i a resultá ku el a konsumí mas
alkohòl ku ta permití. A transportá e sospechoso, un hòmber di inisial M.L.A.M. di 53 aña di edat pa
warda di polis pa un análisis di rosea i a konsekuensia di e resultado di esaki el a haña un prohibishon
di manehá di 5 ora.
Riba djasabra 11 di mei, alrededor di 1.45 or di mardugá, a detené un hòmber di inisial M.Y.C. di 29
aña di edat riba Bulevar Gobernador N. Debrot pa manehá bou di influensia di alkohòl. A mira e
sospechoso sin un hèlm bistí riba su skuter i a dun'é òrdu pa para. Despues di investigashon mas aleu
e sospechoso tabata mustra diferente karakterístika di un persona ku ta bou di influensia di alkohòl.
A hasi un tèst di supla kuné i a resultá ku el a konsumí mas alkohòl ku ta permití. A hiba e
sospechoso warda di polis pa un análisis di rosea i a konsekuensia di e resultado di esaki a konfiská
su reibeweis. E sospechoso a haña but tambe pa manehá sin un hèlm bistí, sin seguro bálido i pa
manehá sin un reibeweis huntu kuné.
Ladronisia di tasnan na bich
Riba djamars 14 di mei a drenta keho di ladronisia di tres tas na un bich situá na Bulevar E.E.G. .
Entre 2.45 or di atardi i 3 or di atardi, deskonosíman a bai ku e tasnan. Ta trata di un tas chikitu koló
pretu ku entre otro komo kontenido un brel di solo sin marka koló bèrdè, un reibeweis Hulandes, un
telefòn koló shinishi skur di e marka Xiaomi Redmi tipo Note 12. E di dos tas tabata un tas di lomba
koló blou ku pretu di e marka Eastpack U.S.A. ku komo kontenido un shùrt koló kòrá, un serbètè, un
pòtmòni ku sèn kèsh, un spiker di marka JBL koló shinishi ku un kaft di rùber koló ros rònt di dje, un
bòshi di yabi, i un telefòn koló bèrdè kla di e marka Samsung tipo A14. E di tres tas tabata un tas
chikitu sin marka koló pretu ku komo kontenido un pòtmòni koló pretu ku sèn kèsh, un pasport, un
brel Melimelo koló bèrdè i un telefòn blòu kla di e marka Samsung tipo Galaxy A53. Mas aleu a bai
tambe ku un telefòn koló pretu di e marka Oppo tipo A54. E tasnan tabata riba bich i a bai ku nan na
momentu ku e doñonan tabata snòrkel. Ta investigando e kaso.
A hòrta outo
Riba djamars 14 di mei a drenta keho di ladronisia di un outo koló pretu, tipo Land Rover modèl Rage
ku plachi di number B-15663. E outo tabata stashoná riba un tereno na Kaya Gresia. Na momentu ku
e doño tabata den un reunion, diripiente el a mira e outo a kore bai for di e tereno. E outo no tabata
na lòk. Ta investigando e kaso.
Aksidente entre skuter i crosser
Alrededor di 4.15 or di atardi riba djamars 14 di mei, 'meldkamer' sentral a risibí notifikashon
tokante un aksidente entre un skuter i un crosser riba Kaya Nikiboko Sùit. Pa motibu te ainda
deskonosí, e dos vehíkulonan a dal den otro. Dor di esaki ámbos shofùr a resultá heridá. Ambulans a
transportá e shofùr di e crosser pa hòspital pa tratamentu médiko i a trata shofùr di e skuter na e
sitio mes. A hiba e crosser warda di polis pa mas investigashon.
Kachónan peligroso
Riba djaluna 13 di mei, alrededor di 2.25 or di atardi, 'meldkamer' sentral a risibí notifikashon
tokante dos kachó ku a ataká e persona ku a mèldu riba Kaya Irma. Na yegada di e patruya, e
persona ku a mèldu a deklará ku e mester a kore pa su bida na momentu ku un kachó máron i un
kachó pretu a atak'é. Un di e kachónan a mordé tambe na su pia robes. Durante ku e víktima tabata
kore, su telefòn a kai i kibra. Na momentu ku e agentenan a bai e kas di e doño di e kachónan, a topa
ku e dos kachónan menshoná riba kaya públiko. E kachónan aki tabata hopi agresivo i tabata kana
dja'ki p'aya. A papia ku e doño di e kachónan riba esaki i el a haña un but pa violashon di e
ordenansa di kachó. Mas aleu e doño di e kachónan tabata dispuesto pa paga tur daño.
KPCN ke hala atenshon di doñonan di kachó pa tene kachónan den kurá dor di sòru pa un kurá bon
será for di kua e kachónan no por sali i/òf pa mara e kachó pa prevení tipo di situashonnan asin’aki.
Abo komo doño ta responsabel pa e komportashon i treinen di bo kachó.
Detenshon pa destrukshon
Riba djaluna 13 di mei, alrededor di 1.15 or di mardugá, a detené un hòmber di inisial U.R.L.R. di 37
aña di edat riba Kaya Korona pa destrukshon. E sospechoso a destruí e porta di dilanti di un banko
riba e kaya menshoná i a duna su mes akseso pa drenta den e edifisio, paso e no tabatin lugá pa
drumi. Ta investigando e kaso.
Detenshon pa maltrato i menasa
Riba djasabra 11 di mei, alrededor di 6.25 or di atardi, a detené un hòmber di inisial J.M.H.C. di 21
aña di edat riba Kaya Pueblo pa maltrato, maltrato ku un arma i menasa. Ta investigando e kaso.
Insidente di tiramentu
Den oranan di mardugá riba djasabra 11 di mei, 'meldkamer' sentral a risibí notifikashon tokante un
bringamentu riba Kaya L.D. Gerharts durante kua mester tabatin tiramentu di bòter i lòsmentu di
bala. Na yegada di e patruya, no a topa ku niun víktima pero si a haña rastro di sanger abou. Ningun
persona no a mèldu na hòspital tampoko ku herida di bala. Personanan presente na e sitio a deklará
di no a mira ni tende nada. Investigashon den e kaso ta andando.