Un mensahe di Tourism Corporation Bonaire
Boneiru ta anunsiá un logro históriko: for di e resultadonan preliminar ta resultá ku na luna di febrüari 2024 nos isla a yama bon biní na 17.218 bishitante stayover.
Pa komparashon: na luna di febrüari di aña 2023 e kantidat total di bishitante tabata 16.136 i na luna di febrüari di aña 2019 esaki tabata 13.700, loke ta nifiká un tendensia positivo den Boneiru su trayektorio turístiko. Esaki ta un oumento di mas òf ménos 6,7% for di aña 2023 pa aña 2024 i un kresementu supstansial di mas òf ménos 25% for di aña 2019 te aña 2024.
E bishitantenan hulandes a keda e grupo di mas grandi ku 44% di e total, siguí pa e merikanonan ku 28,5%. Kòrsou, Canada, Alemania i Aruba a kontribuí den un forma konsiderabel na Boneiru su sektor turístiko.
Na aña 2024 Boneiru a konosé un oumento remarkabel di 22% pa loke ta trata bishitantenan merikano kompará ku e aña anterior, i un oumento supstansial di 81% pa loke ta trata bishitantenan kanades. No opstante e tendensianan akí ku generalmente ta positivo, tabatin un bahada leve di e kantidat di bishitante hulandes di 7923 na aña 2023 pa 7696 na aña 2024, loke ta nifiká un bahada di mas òf ménos 2,86%. E bahada akí ta un konsekuensia di e bahada den e kantidat di buelo i asiento disponibel riba e ruta di Amsterdam pa Boneiru komo konsekuensia di un kambio di e avionnan ku nos partnernan di aviashon hulandes ta usa, i den e kantidat di ruta programá ku nan ta bula.
E bishitantenan merikano a bini prinsipalmente for di New York, Florida, Pennsylvania, California i otro estadonan grandi. E gruponan di edat ku representashon mas haltu tabata esun di 55 pa 64 aña (26,2%) i esun di 65 aña bai ariba (24%), loke ta un indikashon di e interes fuerte serka biaheronan di edat un tiki mas haltu. E bishitantenan hulandes a bini prinsipalmente for di Noord-Holland, Zuid-Holland i Noord-Brabant, kaminda e gruponan di edat di 55 te 64 aña (22%) i di 45 te 54 aña (19%) a dominá.
Mas aleu na luna di yanüari 2024 Boneiru a yama bon biní na 54.446 bishitante krusero riba 24 barku krusero.
Pa estadístika i informashon mas detayá tokante Boneiru su prestashonnan turístiko, bo por bishitá nos wèpsait riba www.bonaireisland.com òf manda un email na info@bonaireisland.com.