Dia 20 di aprel 2021, Boneiru a sali den spòtlait na Merka durante di e programa “Live with Kelly and Ryan” na e kanal di televishon ABC. E inklushon di Boneiru na e programa di “Live with Kelly and Ryan” ta resultado di e diferente inisiativanan di e plan di rekuperashon di Tourism Corporation Bonaire (TCB) huntu ku Diamond Public Relations, ku e meta pa amplia e visibilidat di nos isla na Merka i generá interes i demanda nobo.
Harbour Village Beach Club ta forma parti di e inisiativa aki i a ofresé un pakete di estadia. E presentadónan di e programa, Ryan Seacrest i Kelly Ripa, a duna informashon di Boneiru i Harbour Village Beach Club ora ku nan tabata pasa imágennan di e resòrt ku a wòrdu mirá dor di miónes di televidente. Esaki ta e promé di e tres premionan konsistí di un biahe pa Boneiru ku a wòrdu ganá. E dos premionan di un biahe pa Boneiru lo keda riba e wil te ora esaki nan wòrdu ganá den e segmento di ‘Ready, Set, Grow Trivia’.
Durante di e segmento di ‘Ready, Set, Grow Trivia’, un televidente tabatin e oportunidat pa gana un biahe pa Boneiru pa dos persona si e kontesta e pregunta korekto. E biahe ta inkluí un estadia di 7 anochi den un sùit dilanti di laman na Harbour Village Beach Club i kuminda, E presentadónan di e programa a yama un televidente i a hasi’é e siguiente pregunta: “Menshoná e skol ku Debi Mazar a bisa ku el a asistí na momentu ku e la kuminsá su karera?”. E televidente a kontestá e pregunta korektamente i a gana e biahe pa Boneiru ku ta bal aproksimadamente $9,500. Pa mira e klep, primi aki.
“Nos ta hopi kontentu di mira Boneiru resaltá den e programa di mainta mas popular na Merka,” sra. Derchlien Vrolijk, Marketing Coordinator di TCB a bisa. “Komo parti di nos esfuerso den rekuperashon di turismo, nos ta planiá pa sigui trese e oportunidatnan aki na nos partnernan via di nos agensia di relashon públiko Diamond Public Relations. Asina nos ta sigui amplia e visibilidat di nos isla bunita i tur e kosnan espektakular ku nos tin pa ofresé miéntras ku mundu ta regresá bèk na biahamentu.”
E programa di djamars por wòrdu mira ònlain riba www.kellyandryan.com.
1 comment