Seccion Idioma di Departamento di Enseñansa Aruba (DEA) ta informa cu tin dos buki digital nobo na Papiamento pa mucha, Cascabel den peliger! y Mondi di mangel na rescate! E bukinan aki ta combina storia cu echo tocante nos naturalesa di Aruba. Nan ta publica riba e dos websitenan di Departamento di Enseñansa, papiamento.aw y ea.aw.
Na 2023 a publica e buki E magia di barbulet caba segun e mesun concepto. Meta di e
bukinan aki ta pa conscientisa y informa nos muchanan tocante e importancia di cuida,
proteha y conserva nos dushi naturalesa y tur su biodiversidad. Di e forma aki e bukinan ta contribui na varios meta di desaroyo sostenibel (Sustainable Development Goals), esta SDG 13 (Accion pa clima), SDG 14 (Bida bou awa) y SDG 15 (Bida riba tera).
E bukinan ta pa mucha di 8 pa 10 aña, pero mucha mas chikito of mas grandi tambe por lesa nan, dependiendo di nan nivel di lesamento.
Cascabel den peliger! ta skirbi pa Mili Arends. Den e storia aki Jay y su ruman muhe Kimmy ta bishita Parke Arikok. Ey nan ta papia cu un park ranger tocante e situacion sumamente spantoso di nos cascabel di Aruba.
Mondi di Mangel na rescate! ta skirbi pa Gina Ramsbottom. Den e storia aki Sabrina y su prima Jenny ta haya sa ken ta e monster di Mangel Halto. Y tambe con exactamente e matanan di mangel ta bay salba nos.
Pa lesa e bukinan, bay na papiamento.aw y click riba Biblioteca > Literatura > Buki pa mucha > Buki tocante naturalesa di Aruba.
Tin un coleccion amplio di buki di lesa pa mucha y hoben na Papiamento publica riba e website papiamento.aw y tambe riba ea.aw.
Mas informacion
Pa mas informacion relaciona cu Papiamento por acudi na e website papiamento.aw, sigui @papiamento.aw riba Instagram y @papiamentoAruba riba Facebook.
